Riddu Riđđu lea olu eambbo go dušše suohtastallan
Geasseáigi lea festiválaáigi Sámis. Geassemánu rájes gitta čakčii leat unnit ja stuorát doalut ja festiválat measta juohke vahkkoloahpa. Ikte gaskavahkku álggii okta dain stuorámus festiválain, namalassii Riddu Riđđu Olmmáiváikkis, Davvi-tromssas. Odne álgá maiddái beakkán Midnattsrocken Leavnnjas, Porsáŋggus.
Goappašat festiválat geasuhit olu olbmuid, ja goappašat festiválain leat olu artisttat prográmmas. Midnattsrocken lea čielga musihkkafestivála gos čuojahit sihke báikkálaš artisttat ja eanet dovddus artisttat. Riddu Riđđu ges lea riikkaidgaskasaš eamiálbmotfestivála mas lea prográmma olles bearrašii. Doppe leat guovddážis eamiálbmotmusihkka ja -kultuvra. Prográmmas leat sihke dáiddačájáhusat, teáhterbihtát, dánsun, bargobájit, seminárat, kurssat ja girjjálašvuođadoalut.
Riddu Riđđu festivála lea ge nu olu eará go dušše messostallan ja hervvoštallan. Suohtastallamiid gaskkas leat maid duođalaš ja áigeguovdilis fáttát prográmmas, ja dát fáttát leat maid vuohkkasit čadnon muđui prográmmii.
Dán jagi galleda kanádalaš artista, gii lea dovddus olles máilmmis, Buffy Sainte-marie fas festivála. Buffy Sainte-marie lea dovddus eamiálbmotáššiid ovddasteaddji. Son galgá ge ovttas Tanya Tagaqain, gii maid lea eret Kanádas, ja Ruoŧa bealde sámi artisttain Maxida Märakain ovdanbuktit bihtá mii lea diŋgojuvvon vásedin Riddu Riđđu festiválii. Dát golbma artistta galget ovdanbuktit musihkkabihtá mii lea eamiálbmogiid rahčamušaid birra vuoigatvuođaideaset ovddas ja historjjá birra.
Riddu Riđđu lea máŋgalogi jagi badjel ovdánan jagis jahkái danin festiválan go dát odne lea. Sii geat Riddu Riđu leat čuvvon álgojagiid rájes, leat oaidnán makkár ovdáneapmi festiválas lea leamaš ja movt dat lea šaddan dovddus internášunála festiválan, mii beaggá viidát riikarájiid olggobealde maid. Dan varra eai leat dat nuorat geat fuomášedje álggahit festivála mearrasámi guovllus, olggobealde guovddáš sámi, oba duostan niegadit ge.
Eahpitkeahttá leat sámi- ja eamiálbmotfestiválat dehálaš sámi identitehtahuksemii. Dat leat mielde oažžume olbmuid dohkkehit ja fátmmastit iežaset sámi duogáža.
Riddu Riđđu festivála lea ge nu olu eará go dušše messostallan ja hervvoštallan