198 bohcco duođaštuvvon gottáhallan boraspirii
NORGA: Rovbase.no leat almmuhan man olu bohccot ja sávzzat leat duođaštuvvon gottáhallan boraspiriide Norggas.
Dán olis lea Ealáhus ja boraspiret Finnmárkkus prošeakta geahččan man olu leat Tromssas ja Finnmárkkus duođaštuvvon gottáhallan boraspiriide gaskkal njukčamánu 1. beaivvi ja suoidnemánu 9. beaivvi dán jagi.
Logut dán rádjai čájehit ahte 198 bohcco leat duođaštuvvon gottáhallan boraspiriide. Seamma áigodagas leat fas 14 sávzza duođaštuvvon gottáhallan.
Goaskin vearrámus
Loguin boahtá maid ovdan ahte lea gonagasgoaskin mii lea vearrámus spire.
Dan 198 bohccos mat leat duođaštuvvon borasopiriide gottáhallan leat olles 135 bohcco duođaštuvvon gottáhallan goaskimii, ja 10 sávzza lea gottáhallan goaskimii.
Geatki lea goddán 30 bohcco ja ii ge ovttage sávzza. Albbas fas 25 bohcco ja ovtta sávzza. Guovža lea duođaštuvvon goddán golbma sávzza Tromssas, ii ge ovttage Finnmárkkus.
Muđui leat gávcci bohcco duođaštuvvon gottáhallan ráfáiduvvonboraspirii, muhto eai sáhte dadjat makkár spire lea goddán.