28 olbmo áššáiduhtton go leat gárrenoaivvis vuodján el-čiekčansihkkeliin Købehammanis
Københammana politiijat akšunerejedje dán vahkkoloahpa elektrihkalaš čiekčansihkkela geavaheddjiid vuostá. Dánmárkkus gusket promillanjuolggadusat maiddái el-vuojániidda.
Oktiibuot ledje 28 váldon, 24 ledje alkoholpromillain ja 4 ledje gárrenmirkkos váikkuhuvvon.
Politiijakomissára Peter Veje dieđiha Dánskka TV2:I ahte leamaš lassáneapmi loguin gos čiekčansihkkel lea čadnon láhkarihkkumiidda. Elsihkkel rehkenastojuvvo mohtorfievrun Dánmárkkus.
Dán vahkkoloahpa áššáiduhttimat leat dássážii vuosttaš čohkkejuvvon logut, main sáhttá govvadusa oažžut das ahte makkár viiddodagas dát áššit leat.
Norggas ii leat promillarádji elčiekčansihkkel geavaheamis. Lea juohkehačča duohken árvvoštallat dovdet go oadjebassan vuodjit elsihkkeliin. Nu guhká go vuodjin lea dohkalaš, de lea prinsihpa mielde lobálaš.