– Sámi alfabehta haga ii birge Davvi-norggas
Sámediggeráđđi Mikkel Eskil Mikkelsen (NSR) ii loga oba vejolažžan ge birget davvin jus ii dovdda sámi bustávaid.
Sámediggeráđđi oahpahusáššiin, Mikkel Eskil Mikkelsen, lohká áibbas dárbbašlažžan bisuhit sámi alfabehta Norgga oahppoplánain. Sámegiella lea oidnosis Norgga servodagas, ja álbmogis ferte leat dasa máhttu.
– Mii leat oaidnán čielgasit máŋgga áššis ahte ovdamearkka dihte AMK heahteveahkkeguovddážiidda davvin lea váttis olahit báikkiide main leat sámegiel namat, juste dan geažil go olbmuin váilu sámegielmáhttu ja ipmárdus sámi namaide. Dien árvalusa oahppoorganisašuvnnas mii gal hilgut oalát, dadjá Mikkelsen Ávvirii.
7000 vástádusa
Oahpahusdirektoráhtta galgá fargga lohkat badjel 7000 gulaskuddancealkámuša, maŋŋel go cealkináigi ođđa oahppoplánaide nogai geassemánu 18.beaivvi.
– Beare olu dárbbašmeahttun
Ohppiidorganisašuvdna lea cealkán ahte sámi alfabehta galggašii sihkkut oalát eret Norgga oahppoplánain, go dálá oahppoplána lea juo beare dievva ja maid boarásmuvvan.
–Mii vuorrástuvvat, Fágaođastusa vuolggasadji han lei ahte oahppoplánaid galggai unnidit vai oahppit ollejit oahppat, ja ahte dat mii lea sisdoallun, lea relevánta. Dál leat oba guhkkin eret dien mihtus, dadjá Ohppiidorganisašuvnna jođiheaddji Alida de Lange D’agostino preassadieđáhusas. Sii lohket sáhttit sihkkut eret čázi birrajohtima, sámi alfabehta ja beali risttalašvuođaoahpus.
Baicca eambbo sámi sisdoalu
Sámediggeráđđi oaivvilda ahte fertešedje baicca vel eambbo ja čielgasit sámi gelbbolašvuođamihttomearit. Sámediggi lohká bargat dan badjelii, ja sis lea ge maid fápmu mearridit sámi gelbbolašvuođamihttomeriid maiddái nationála oahppoplánain.
– Sámegiella lea oassin Norgga servodagas, ja lea áibbas dárbbašlaš máŋgga praktihkalaš siva geažil. Jus mat vánddardit galgá Davvi-norggas, de ii birge sámegiel máhtu haga. Oažžu nu garrasit juo lohkat ahte jus sihkku sámi bustávaid, de sihkku maid vejolašvuođa máhttit lohkat kárttaid olles Davvi-norggas, dadjá Mikkelsen.