Girdisoadji doddjui girdis mii gahčai Ubmis
Ruoŧa áibmojohtolatlihkohisvuođaid lávdegoddi dieđiha ovtta girdi soaji leat doddjon áimmus go girdi gahčagođii sullii 4000 mehter allodagas. Vuossárgga álggahuvvui guorahallanbargu lihkohisvuođas mas ovcci olbmo masse heakkaset, gávccis dáin ledje seaivunsuodjenjuikejeaddjit, čállá NTB.
Oassi dan nuppi soajis ii gávdnon girdi bálddas, muhto eará sajis, dat lea doddjon áimmus, muitala Ruoŧa áibmojohtolatlihkohisvuođaid lávdegotti jođiheaddji Peter Swaffer.
Ii lean čáhppes boksa
Gahččan girdis ii lean rusttet mii registrere mátkki ja hállama ja nu ferte kommišuvdna dorvvastit čilgehusaide maid ožžot vihtaniin, teknihkalaš guorahallamiidda sihke gahččan girdis ja filbmejuvvon filmmain, gos oidno mo girdi jorai ja gahčai njuolga eatnamii njuniin álggos.
Ruoŧa seaivunsuodjenjuikejeddjiidsearvi lea mearridan ahte girdimearka Gippsaero GA8 Aivan ii galgga geavahuvvot ovddasguvlui. Norggas eai leat dákkár girdit registrerejuvvon, muitalit Áibmojohtalusbearráigeahčus NTB: ii.
Váilevaš rusttegat
Rusttegat gahččan girdis leat registreren man allodagas ja posišuvnnas girdi lea girdán, muhto ii maid pilohta lea bargan dahje makkár vávus mohtora lei.
Girdi lea buvttaduvvon Austrálias, ja fabrihkka dadjá iežaset ovttasbargat ruoŧa áibmojohtolateiseválddiiguin gávnnahan dihte siva go girdi gahčai olggobeale Stora Sandskär sullo Ubmis sotnabeaivvi. Girdi mii geavahuvvui báikkálaš seaivunsuodjenjuikejeddjiidsearvvis, lea sullii ovcci mehter guhkki ja das lea propealla njunis. Áibmojohtolatlihkohisvuođaid guorahallamat dákkár girdigahččamis ádjánit birrasiid jagi. Swaffer dieđuid mielde sáhttet ádjánit vel guhkit jus šaddá dárbu háhkat eanet dieđuid ja tevnnegiid olgoriikkas.