BÁHKAT leat viimmat dáppe
Playa de Kárášjohka:
Báhkat geasuhit olbmuid Kárášjoga sáttogáttiide návddašit beivviid johkagáttis. Dál viimmat leat báhkat ja olbmot leat jođánat návddašit daid.
Dál lea šaddan bivnnut govddodit bossojuvvon flamingo alde ja okta sis lea Mathis Andreas Oskal. Son lei návddašeamen báhkaid Báhkkiljogabeachas, muhto vuige ahte livčče galgan gal leat veaháš galbmaset dálki.
– Buorre gal lea go lea báhka, muhto dat ii dagašii maidige ahte livččii moadde gráda galbmaset. Dán klimái in leat dahkkon. Dat lea buorre go leat fiinna dálkkit ja eai leat arvvit, dadjá Mathis Andreas sáttogáttis.
Govddoda Flamingoin
Mathis Andreas muitala ahte lea buot buoremus leahkit sáttogáttiin go leat báhkat.
– Dál ii dárbbaš jurddašit vuolgit sydenii go leat dákkár dálkkit dáppe, lohká son.
Son čájeha dan flamigo maid lea oastán ja man alde sáhttá govddodit jogas.
– Dát gal lea hui vuogas, livččii galgan leat unna áŋkor velá vuoi seamma sajis čuožžu. Jus dáinna vuolggán dál, de gal borjjasta gitta šalddi lusa, dadjá Mathis Andreas ovdal go manai govddodit.
Vuosttaš geardde vuodjimin čáhceskohteriin
Guovttis geat boahtiba čáhceskohteriin bajás joga go Ávvir lea Báhkkiljogabeachas leaba Erke Niillasa Randi ja Tove Turi. Soai leaba vuodjime beaivvášvuoidasa nuoraide geat leat návddašeamen beaivváža sáttogáttis.
– Dat lea vuosttaš geardde moai letne vuodjimin dainna ja lea veaháš issoras go ean máhte dainna, dadjá Tove Turi.
– Dat lea starggas dainna vuodjit ja johtilit aŋkke boahtá. Mun gal ádden manne olbmot ostet dieid, go lea hui somá, dadjá Randi.
Návddašeaba beaivváža
Soai lohkaba vuordán báhkaid ja návddašeaba dan nu olu go sáhttiba.
– Olmmoš dárbbaša dálvái daid vitamiinnaid maid beaivváš addá, lohká Tove.
– Ii galgga bargat go lea báhkat, dalle galgá návddašit beaivvi go olmmoš gal geargá bargat eará go eai leat šat dát báhkat, dadjá Randi ovdal go soai Toviin čohkkedeigga čáhceskohtera ala ja vuoddjáiga vulos Mágibeachii.
Beachvolleyspábba somámus go lea báhkka
Muhtimat liikojit velohallat sáttogáttiin ja návddašit beaivváža, ja earát ges speallet beachvollyspáppa. Hilke Halbertsma, Jens Mikal Holmestrand, Johan Lemet Holmestrand, Jens Åge Holmestrand ja Simon Tobias Holmestrand návddašit báhkaid beachvollyspáppa spealadettiin.
– Buot buoremus lea speallat beachvollyspáppa ja njuiket johkii go leat dan mađe báhkkanan, huiket gánddat oktii njálmmiid dan botta go spellet.
Sii lohket leat vuordán guhká ahte báhkat galge boahtit vai besset návddašit eallima sáttogáttis.
Eai lean vuordán dákkár báhkaid
Mágibeachii leigga Suoma turistta guovttos, Ella Lautaniemi ja Henna Numminien, bisánan návddašit sáttogáddeeallima ovdal mannaba viidáset mátkái.
– Eat mii lean vuordán dákkár dálkkiid. Dáppe lea báhkkaset go Helssegis gos letne eret. Mis leat eanaš dušše dálvelágan biktasat mielde ja okta mis ii lean váldán mielde biktasiid maiguin sáhttá gálašit, lohká Henna.
– Diibmá mii maid finaimet dáppe Davvi-norggas luomustallamen, muhto dalle gal ii lean ná báhkka, dadjá Ella.
Maŋŋá go ledje vuojadan ja návddašan báhkaid de sii jotke viidáset Sállirii vánddardit váriid mielde.