FESTIVÁLAT sihkkarastán iežaset gussiid
Vuovdán buot bileahtaid: Dán vahkkoloahpa lea olu mii dáhpáhuvva, muhto dát festiválat gal leat sihkkarastán iežaset gussiid.
Dán vahkkoloahpa lea olu mii dáhpáhuvvá, ja máŋga festivála lágiduvvojit dan seamma vahkkoloahpa.
Liikká ii oro dat váikkuheame smávit festiválažiidda gilážiin.
Fásta geahččit geat bohtet juohke jagi
Dán vahkkoloahpa lágiduvvo sihke Márkomeannu, Dansklacken på Dosan, Kunesdagan, Sørøyrocken ja Langfjorddagan.
Dat ii baldde aŋkke buot festiválašeaffaid. Sørøyrockena festiválašeaffa, Marie Jastrey Albertsen, lohká iežas illudit.
– Mis gal leat fásta geahččit, nu ahte mii gal leat vuovdán buot bileahtaid. Dan leat dahkan áigá, nu ahte midjiide gal dat ii čuoza bearehaga, dadjá son.
Alla vuordámušat
Albertsenis leat alla vuordámušat dán jagá festiválii.
– Dál gal leat alla vuordámušat. Illudan hirbmosit, šaddá hui somá. Illudan dassái mii boahtit johtui ja beasan oaidnit olbmuid suohtastallame.
Sørøyrocken lea bivnnuhis festivála, ja ii leat vuosttaš geardi go leat vuovdán buot bileahtaid.
– Vahkkoloahpabileahtaid gal leat vuovdán visot máŋga jagi. Diibmá eat jođihan buot duorastatbileahtaid, muhto dan gal dahkat dán jagi, muitala son.
Máŋggabealat prográmma geasuha
Maiddái festivála mii lágiduvvo Gussanjárggas seamma vahkkoloahpa, lea bivnnut. Sii leat maid vuovdán buot bileahtaid oanehis áiggis. Maiddái liigebileahtaid maid ledje bidjan vuovdit jávkkihedje.
– Nu go mun lean vásihan bileahttavuovdima, de jáhkán dat lea ollislaš prográmma mii dagaha dan, variašuvdna prográmmas, dadjá Kunesdagan lágideaddji, Alf Edvard Masternes.
Dasa lassin leat ožžon áigeguovdilis KEIINO boahtit guoimmuhit, geat maid geasuhit olbmuid.
– Diehttelas leat ollugat geat bohtet oaidnit ja gullat KEIINO, Mari Boine ja Rolffa feat. GM. Mis han lea variašuvdna min musihkkaprográmmas dán jagi nu ahte jáhkán dat lea miellagiddevaš.
Vuosttaš geardde vuovdán buot bileahtaid
Dat ii leat dáhpáhuvvan ovdal ahte Kunesdagan bileahtat leat jođihuvvon visot.
– Lean hui speantta. Mu vuordámušat leat ahte geahččit geat bohtet min lusa galget dovdat iežaset bures boahtin ja loaktit dáppe, dadjá Masternes.