JÁPMÁN njuorju gávdnon johkagáttis
Jápmán njuorju lea gávdnon sáttogáttis lahka Skiippagura, Deanu gielddas. Deanučázádaga Guolástanhálddahusa (DG) ráđđeaddi, Narve Stubbraaten Johansen, ii loga diehtit man lunddolaš lea ahte njuorju jápmá jogas.
Deanučázádagas lea gávdnon jápmán njuorju. Njuorju lea gávdnon gaskkal Skiippagura ja Jávvájoga Deanu gielddas. Lei Leif Pedersen gii gávnnai njuorjju sáttogáttis, son lea eahpesihkar movt njuorju lea dasa sáttogáddái boahtán.
– Dát dušše duođašta ahte leat njuorjjut jogas. Dat ii leat eahpedábálaš ahte leat njuorjjut jogas. Jáhkán ahte vuotna lea nu dievva njuorjjuin Deanunjálmmis, nu ahte njuorjjut bahkkejit johkii. Mun jáhkán ahte leat njuorjjut mat hehttejit luosaid beassat bajás johkii gođđat, lohká Leif Pedersen, gii gávnnai jápmán njuorju.
Son lohká son ii sáhte oaidnit makkár sivain njuorju lea jápmán ja son ávžžuha sin geain lea gelbbolašvuohta dákkáriidda, vuolgit geahččat.
Njuorju oidnon Barttas
Juohke geasi čoahkkanit lagabui 200 njuorjju Deanunjálbmái ja dán geasi leat muhtimat oaidnán njuorjjuid gitta Barttas, Kárášjoga gielddas. Árrageasi gávnnahalai ge njuorju muhtin buođus, lahka Ohcejoga.
Deanučázádaga guolástanhálddahusa (DG) ,ráđđeaddi Narve Stubbraaten Johansen, lohká son ii leat ožžon dieđuid ahte lea gávdnon okta jápmán njuorju čázádagas.
– Mii leat ožžon dieđuid ahte lea njuorjjut Deanučázádagas ja dán geasi lea oidnon njuorjjut gitta Barttas. Leat maiddái registreren sosiála mediaid bokte ahte leat njuorjjut Sieiddáguoikkas. Mii oaidnit dál ahte dat ii leat eahpelunddolaš ahte njuorjjut leat čázádagas, muhto eat dieđe ahte man lunddolaš lea ahte jápmet go leat čázádagas, dadjá ráđđeaddi Narve Stubbraaten Johansen.
Ávžžuha váldit oktavuođa
Jus njuorju ihtá čázádahkii de ávžžuha Stubbraaten Johansen dán dieđihit sidjiide. Njuorjju mii lea jogas ii leat lohpi báhčit vaikko geas, go dasa adno báhčinlohpi guolástusdirektoráhtas.
Suoidnemánus 2006 báhččui njuorju lahka Váljoga, badjel 150 kilomehtera bajábealde Deanunjálmmi. DG ráđđeaddi ii loga su dieđuid mielde njuorjjuid leamaš badjelis go dat mii Váljogas báhččui.
Áigu vuolgit geahččat
DG ráđđeaddi lohká son áigu vuolgit geahččat njuorjju, muhto ii dieđe boahtá go guorahallat nu sakka go njuorju lea leamaš johkagáttis báhkkasis.
– Dat livččii somá oaidnit maid njuorju lea borran, muhto jus lea čužžon ovtta áigge de in dieđe storren go. Mii dábálaččat eat bargga dan, go mu dieđuid mielde eat leat goasse ge dan dahkan, dadjá DG ráđđeaddi.