Dárbu ráhkkanit meahccebuollimiidda
Sihkar- ja gearggusvuođa direktoráhtta DSB lea sádden preassadieđáhusa mas dieđihit stuora buollinvára Nordlándda, Romssa ja Finnmárkku fylkkain. Dál lea meahccebuollinhelikopter gearggusin Romssas, lassin dan helikopterii mii lea gearggusvuođas Sandefjordas. DSB direktevra Cecilie Daae dadjá preassadieđáhusas ahte geasset leat maid máŋggas geat vánddardit luonddus, ja sii leat válljen lasihit gearggusvuođa ja lea okta helikopter Romssas mii lea gearggusin loktanit jus lea dárbu.
Lea buorre go gearggusvuohta lea lasihuvvon meahccebuollimiid várás, muhto liikká lea stuora jearaldat lea go dat doarvái. Ovdamearkka dihte muitala Kárášjoga gieldda buollin- ja čáskadanbálvalusa hoavda, Nils Asllat Kildedam, ahte sis eai leat makkárge erenoamáš gearggusvuođat. Dasa dieđus lea sivva, ahte Kárášjoga gielddas, mii lea smávva gielda, leat unnán resurssat maiguin sáhttet lasihit gearggusvuođa dusten dihte meahccebuollimiid. Dat lea ieš alddis áddehahtti, go smávva suohkaniin hehttejit sihke ruđalaš ja olmmošlaš návccat lasihit gearggusvuođa.
Lea buorre go gearggusvuohta lea lasihuvvon meahccebuollimiid várás, muhto liikká lea stuora jearaldat lea go dat doarvái.
Liikká orro dat juoga maid berrejit álgit smiehttat, ahte mot ráhkkanit boahttevaš meahccebuollimiidda. Dákkár buolli báhkat mat leat leamaš Davvi-norggas maŋemus áiggi, dáidet boahtit ain eambbo maŋit gesiid, go diibmá dadje juo meteorologat ja eará dutkit, ahte báhkat maid dál vásihat, leat duođaštussan dálkkádatrievdamiidda, ja ahte dákkár geasit šaddet eambbo dábálažžan boahtteáiggis. Dat mearkkaša de ahte meahccebuollinvárra šaddá eambbo dábálaš maiddái árktalaš guovlluin. Dat lea juo muittuhus ahte eambbo meahccebuollimat dáidet šaddat boahtte áiggis, ja dasa dieđus fertejit suohkanat buorebut ráhkkanišgoahtit. Dat dieđus eaktuda ahte guovddášeiseválddit láhčet suohkaniidda dan vejolašvuođa juolludemiiguin stáhtabušeahtas.
Jaŋádahkan ferte ge leat erenoamáš várroga go lea mehciid vánddardeame vai ii bullet eatnamiid. Jus šaddá dolastit, de cahkkehit dola dakkár báikái gos ii leat nu stuorra buollán várra, ovdamearkka dihte johka – dahje eará čáhcegáddái. Seammás lea maid dehálaš ahte dola jáddada albma láhkai. Danne lea ge dehálaš ahte dolasta lahka báikki gos lea valjis čáhci. Seammás fertet muitit ahte meahcis ii leat lohpi boaldit maidege gaskkal cuoŋománu 15. beavvi ja čakčamánu 15.beaivvi, nu ahte dan lága soaittášii buoremus doahttalit go dákkár goikkádagat leat.