Kárášjoga giehtaspábbájoavku Troandimii
Kárášjoga giehtaspábbasearvi lea oassálastimin EURO Youth Campai Troanddimis 2020:s.
Norgga Giehtaspábba Searvi lágida Troanddimis EURO Youth Camp, Eurohpá meašttirgilvvu oktavuođas. EURO Youth Camp lea nuoraide gaskkal 12 ja 18 jagi ja lágiduvvo ođđajagimánu 11. ja 12. beaivvi. Dat mii lea erenoamáš lea ahte buot joavkkut mat oassálastet, besset ieža giehtaspábbagilvvuide oassálastit beaivet ja eahkedis besset fas geahččat meašttirgilvvuid.
Guhkes áigi dan rájes go EM leamašan Norggas
– Lea guhkes áigi dan rájes go EM lea lágiduvvon Norggas, nu ahte dát lea diekkár vásáhus maid oktii eallimis vásiha, muitala Guttorm.
Son muitala ahte sii leat oktiibuot 20 mannamin Troandimii, 12 máná ja 8 váhnema, geain guovttis leaba joavkojođiheaddjit.
– Mii hálaimet ahte mii fertet mannat go dákkár vejolašvuohta boahtá, ja go mánát vel besset ieža speallat giehtaspáppa lassin ahte beassat geahččat 4 gilvvu, muitala Guttorm.
Oassálastán movttiidahttima dihtii
Janice Guttorm muitala ahte sii leat maid oassálastimin dan dihte go soaittášii geasuhit earáid searvat giehtaspábbavaláštallamii.
– Mii háliidat maid movttiidahttit mánáid vai sii jotket giehtaspáppain. Go mii mátkkoštallat tuvrraide de oidnit ahte beassat fitnat veaháš gos ge. Leat leamašan Hársttáin, Romssas, Álttás ja Gironis gilvalemiin.
Son dadjá ahte mánát dávjá heitet go šaddet boarráset ja álget spábbačiekčamiin ja son háliidivčče ahte mánát ja nuorat galget joatkit go oidnet makkár fálaldagat sis leat.
Eai leat sponsorat
– Mii leat áiddo álgán ruhtačoaggimiin nu ahte mis lea olu bargu vel ovdal go lea doarvái ruhta mátkái. Buot mátkkiin gos leat fitnan, leat ieža ruhtadan, muhto áinnas áiggošeimmet sponsoriid, muitala Guttorm.
Son muitala ahte sii leat čoaggán ruđa veaháš mo ge dan rájes go ožžo bovdehusa oassálastit EURO Youth Camppai.
– Mii leat vuovdimin konvoluhtaid, čoaggit bohttaliid ja lea hui olu váhnemiid duohken go barget álbmogassii.
Smávvát muhto lášmadat
– Mun gal jáhkán dat boahtá mannat bures doppe, mis leat čeahpes gánddat ja lea hui somás ja movttegis joavku. Speallamis maid doaivvun mannat bures, min gánddat leat smávvát earáid ektui muhto leat hui lášmadat, ja lea maiddái somá beare vuolgit go beassat Em-gilvvuid geahččat ja leahkit sosiála doppe.