Eai sáhttán ruoktot vuolgit ovdal go bártnáš gottii guoli
Mannan vahkku sáddii Per Ole A. Eira gova sáiddis Ávvira mánáidoaggungilvui. Son vuitii oaggunstávrrá.
Dán vahkku lea Ávvir vuorbádan fas ođđa oaggunstávrá vuoiti. Per Ole A. Eira gottii sáiddi go lei mearas oaggumen vuosttaš háve. Su fárus lei su muoŧŧá ja stuoraviellja.
– Mii leimmet moadde diimmu oggon, leamašan tuvrras ja vuodján mearragátti. Per Ole lei oahpahallamen bálkut vuokka ja mun veahkehin su bálkut, muitala bártnáža muoŧŧá Ann Máret Eira, gii lei vieljjašguoktáin oaggunmátkkis mannan vahkku.
Vuosttaš guolli
Eira muitala áhte luntta lei dan beaivvi hui áŋgir guliid bivdit.
– Per Ole dajai munnje ahte mii eat sáhte ruoktot vuolgit ovdal go son lea goddán guoli, mii leimmet juo moadde diimmu oggon, de son gal lei hui duhtavaš go de viimmat gotti guoli. De gal beasaimet mii ruoktot vuolgit buori mielain. Ann Máret Eira jáhkká ahte lea vuosttaš guolli maid su muoŧŧal goassege lea goddán.
– Son ii bártidan oažžut guoli gáddái. Dat manai hui bures ja son giesai ieš gáddái. Dat lea várrá vuosttaš geardde go lea goddán guoli obage. Mun in leat sihkkar lea go jieŋa alde goddán, muhto mun in báljo jáhke, muitala Ann Máret Eira.
Njunehisvuogga
– Mii leimmet Gávvuonas, Álttá suohkanis oaggume. Mánešjoganjálmmis mii oakkuimet, muitala bártnáža muoŧŧá.
Dán háve son lei maid hárjehallamen oaggut. Eira muitala ahte son lea ovddit jagiid hárjehallan oaggut vuokkain mas eai leat njunit.
– Mun jáhkán ahte son lea eanus geahččalan oaggut ovdal, muhto ii son leat gal nu bearehaga doppe oggon. Son lea oainnat diibmá oggon aivve dakkár vuokkain mas eai leat njunit, danin go son lea dušše oahpahallan oaggut.
Oakkušii birra jándora
Bártnáža muoŧŧá lohká hui suohtasin go Per Ole vuittii ođđa stávrrá ja muitala ahte bárdni liiko hui bures oaggut.
– Son háliidivčče juohke beaivvi oaggut! Jáhkán ahte son livčče hui viššal oaggut jus mii livččiimet viššalat su veahkehit. De gal son várra oakkušii birra jándora. Son gal hui sihkkarit boahtá geahččalit ođđa stávrrá doppe Návvenis gos sis lea geasseorohat, muitala vel loahpas Per Ole muoŧŧá.