Vuittii Spleis geassegilvvu
Fáhkkestaga riŋgii Spleis Inger Anne Pulkii ja muitalii ahte su ruhtačoagginprošeakta lea vuoitán sin geassegilvvu mas ieš ii oba diehtánge ahte lei mielde.
Inger Anne Pulk lea čoaggimin ruđa iežas Tanzania ustibii, Margarethii, vai son beassá boahtit Norgii ja Guovdageidnui lohkat allaskuvllas. Stáda gáibida ahte earret eará Afrihká studeanttat, geat áigot Norggas oahpu váldit, fertejit duođaštit ahte sis lea 121 000 ruvnno ovdal go bohtet studeret. Dasa lea Inger Anne Pulk čoaggimin ruđa ja lea dan oktavuođas ráhkadan Spleis -konto man bokte olbmot sáhttet ruđa addit.
Spleis geassegilvu
Dan botta go ieš lei ruovttus vealláme nuorvvuin, de fáhkkestaga riŋgii amas nummar sutnje. Go vástida, de lea Spleis ovddasteaddji gii riŋge muitalit ahte Inger Anne ja su ruhtačoagginprošeakta lea vuoitán Spleis geassegilvvus 5000 ruvnno.
– Vuoitán go? Maid vuoitán? vástidii Inger Anne.
– In mun diehtán maidege dan gilvvu birra, in mun lean searvan makkárge gilvui in ge álggos ipmirdan maid dat olmmái gii riŋgii oaivvildii. Muhto go ožžon čielggadussii movt dat lei, de dieđusge movttáskin issorasat. Šattai olu geahppaseabbo leahkit nuorvvus ja feberiin dan beaivvi, reaškkiha Pulk.
Kvalitehtaduođaštus
Spleis doallá máŋgii jagis gilvvu mas sii ieža siskkáldasat isket buot ruhtačoagginprošeavttaid ja vuorbádit vuoiti mii sin mielas ánssáša dan. Dán háve ledje njealjis geat vuite, guokte prošeavtta vuite 2000 ruvnno ja guokte prošeavtta 5000 ruvnno. Inger Anne Pulk prošeakta lei okta dain mii vuittii 5000 ruvnno.
Inger Anne muitala ahte Spleis atná dehálažžan su prošeavtta go ruhta manná oahpaheapmái ja solidaritehtii, ja Pulk atná hui árvvus dan go Spleis lea skeŋken su prošektii ruđa. Son lohká buori kvalitehtaduođaštussan ahte dan maid son dahká lea dehálaš, ja dan oidnet earát maid. Danne sávvá ge ahte olbmot ain dorjot dan vai Margareth beassá Guovdageidnui boahtit oahpu váldit.
Gearggus vuolgit
Margareth lea ain Tanzanias vuordime movt ruhtaprošeavttain manná. Son ilosmuvai issorasat go gulai ahte prošeakta lea vuoitán gilvvu, ja son lea gearggus boahtit Norgii nu jođánit go lea gártan nohkka ruhta.
Inger Anne muitala ahte áigi manná jođánit ja fargga lea skuvlajahki álgime.
– Danne sávan ge ahte fitnodagat ja searvvit, mat leat mus ožžon e-boastta dán geasi, vástidivčče munnje ja dorjot prošeavtta. Sihke mus ja Margarethas lea jáhkku dasa ahte son galgá ollet deike boahtte čavčča.
Mii eat lihkostuvvan oažžut Spleis ovddasteaddji ságaide.