Badjel 1,1 miljovnna Dáiddadálu almmustahttimii
Guovdageainnu stuorimus «čiegusvuohta» galgá dál eanet oidnosii boahtit, go dál galgá Dáiddadállu čálmmustahttot buorebut sihke sosiála mediaid bokte ja maid filbmabihtáid bokte. Dasa leat sii miljovdnadoarjaga ožžon.
Soaittát doaivut ahte Dáiddadállu lea juogalágan kulturásahus gos muhtun dáiddárat astoáiggis čohkkájit, juhket gáfe, joavdelastet ja hutket iešguđetlágan doaimmaid.
Dat lea nu guhkkin eret duohtavuođas go sáhttá leat. Dáiddádállu lea okta dain stuorimus «fitnodagain» Guovdageainnus gos riikkaidgaskasaš ja nášunála dásis dáidda riegáda.
Olles 18 dáiddára láigohit saji Guovdageainnu Dáiddadálus, mii jáhkkimis lea Sámi stuorimus dáiddačoahkkaneapmi, jus ii juo áiggiid čađa stuorimus Sámis.
Oahppat čalmmustahttit
Go Ávvir fitná Dáiddadálus Guovdageainnus, de lea sii buohkat kurssas Diehtosiiddas. Doppe galget sii oahppat movt buorebut galget čalmmustahttit Dáiddadálu ja guhtege iežaset doaimma.
Dáiddadálu beaivválaš jođiheaddji, Dine Lynge Fenger, muitala ahte sii leat duođalaččat bargame boahtit eambbo oidnosii servodagas ja maid viidát máilmmis.
– Mii leat dál ožžon Norgga buoremus sosiála media oahpaheddjiid midjiide doallat kurssa movt mii ieža sáhttit guhtege čalmmustahttit iežamet doaimma. Dat lea okta oassi dan strategiijas mii mis dál lea ahte nagodit vel eambbo oidnosii boahtit dáiddáriid ja Dáiddadálu bealis, muitala son.
Badjel miljovnna čalmmustahttimii
Fenger Lynge muitala ahte sii leat ožžon doarjaga earret eará Norgga Kulturráđis, Finnmárkku fylkkagielddas, Sámeráđis ja Seastinbáŋkku Davvi-norggas.
Fenger lynge ii hálit juste daid supmiid birra hupmat, muhto Ávvira dieđuid mielde lea dat birrasii 1,1 miljovnna ruvnno maid sii dál galget atnit Dáiddadálu ja dáiddariid čalmmustahttimii.
– Dat supmit maid leat ožžon lea oassi dan čalmmustahttinprošeavttas man mii leat bidjan johtui dál, ja mas okta unna oasáš lea juste sosiálamediakursa, muitala son.
Go Dáiddadállu lea ožžon badjel miljovnna čalmmustahttit iežaset doaimma, de muitala dat ahte ruhtadeaddjit leat mearkkašan man stuora ásahus Dáiddadállu duođaid lea.
– Na mii eat stoaga gal. Mii bargat hui duođalaččat ovdánahttit Dáiddadálu ja dakko bokte iežamet dáiddariid. Mihttu lea boahtit eambbo oidnosii, muitala Fenger Lynge.
Filbmejuvvot
Son muitala ahte Dáiddadálus leat nu máŋggabealat dáiddárat ahte sii sáhttet bargat vaikko maid iežaset máhtuin.
Earret eará leat Dáiddadálus giehtadáiddárat geat ráhkadit visuáladáidaga, vuoigŋadáiddárat geat musihka ja teavsttaid ráhkadit, neavttárat, filbmabargit, ja nu ain.
– Mii galgat virgádit bargi gii galgá bargat sosiálamediaiguin min dáiddariid ovddas Dáiddadálus, mii galgat filbmet maid sin barggu ja maid mii dáiddadálus bargat. Nu lea dat duođaid stuora prošeakta. Visot daidda prošeavttaide mis leat alddiineamet olbmot geat hálddašit dan issoras bures, muitala son.
– Mun illudan viidáseappot ain bargat dáppe, go mis leat ain stuora prošeavttat maiguin leat bargame, muhto daid birra in áiggo vuos hupmat, lohká Fenger Lynge Ávvirii.