II NJUOVA jus Jovsset Ánte ii suova
Finnmárkku áidna boazonjuovahaga jođiheaddji Are Figved ii loga sin njuovvat Jovsset Ántte bohccuid jus son ii áiggo njuovvat.
– Finnmark Rein doarju boazoeaiggádiid geat vuvdet midjiide, ja dieđusge maiddái Jovsset Ántte. Mun persovnnalaččat jurddašan olu su birra ja doarjjun su dán duođalaš dilis. Fálá orohaga boazodoallit leat olu jagiid leamaš oskkáldas vuovdit ja ovttasbargoguoimmit mis, ja mii áigut ain buoremus lági mielde doarjut sin geat vuvdet midjiide gávpebohccuid. Jus Jovsset Ánte ii hálit ahte su bohccot galget njuvvot min njuovahagas, de eat njuova su bohccuid. Midjiide lea dat diehttelas ášši, dadjá Figved Ávvirii.
Son lohpida baicca sihke ekonomalaš ja juridihkalaš veahki gokko sii fal sáhttet veahkehit.
Čakčamánus bággonjuovvan
Nuorta-finnmárkku diggegoddi lea Stáhtii dál addán lobi bákkuin njuovvat Jovsset Ánte Sara bohccuid.
Diggecealkámusaš boahtá ovdan ahte Hámmárfeastta ja Fálesnuori bággobearreváldi galgá čađahit bággonjuovvama boahtte mánus. Eanandoallodirektoráhtta galgá lágidit ja plánet njuovvama. Dan bargui servet maid Biebmobearráigeahčču, boazopolitiijat, njuovahat, lohkkit ja Fylkkamánni ovddasteaddjit.
Stáhta bálvvát galget vuordime gárdde luhtte go Fálá orohat 20 boahtá geasseorohagas gátte beallái Fálesnuori suohkanis.
ON ii mearkkašan maidege
Jovsset Ánte Sara lea váidán Alimusrievtti bággonjuovvanduomu ON olmmošvuoigatvuođalávdegoddái. Dat lávdegoddi lea ávžžuhan Norgga stáhta vuordit bággodoaimmaiguin dassážii go sii leat meannudan ášši. Muhto diggi ii váldán vuhtii dan ávžžuhusa ja ákkastallá ahte stáhta ii leat geatnegahtton doahttalit dan lávdegotti rávvagiid. Sara lea maid čilgen diggái ahte ii leat praktihkalaččat vejolaš ollašuhttit bággonjuovvama čakčamánus dán jagi.
Máksit buot goluid
Muhto dál beassá Stáhta lágalaččat fámuin ollašuhttit Norgga Alimusrievtti duomu, mas Sara vuoittáhalai unnidit ealu 75 heggii. Dan boazolohkui leat boazodoalloeiseválddit su gohččugoahtán unnidit juo 2013:s.
Duomus celko ahte Sara galgá máksit goluid, ja jus eai beasa čađahit doaimmaid čakčamánus dán jagi, de sáhttá Sara šaddat máksit oasi ovddalgihtii.
Finnmárkkus eai leat njuovahagat
Finnmark Rein lea dál áidna boazonjuovahat Finnmárkkus, maŋŋel go Min Boazu reastaluvai geassemánus. Finnmark Rein láigoha Norturas njuovahaga Kárášjogas, muhto buot boazonjuovvamat doppe galget maid mannat Finnmark Rein bokte.
Mii eat ožžon ságaide Jovsset Ánte Sara eat ge su advokáhta Trond Biti dán áššái.