VÁROHIT GOLBMA DUHÁHA ruoššaluosa Deanočázádagas
Deanučázádaga Guolástanhálddahus (DG) vároha 3000 ruoššaluosa dál Deanočázádagas.
Deanučazadagas ja muđui Finnmárkku luossajogain eai leat goassege leamaš nu olu ruoššaluosat go dán jagi. Dušše Deanočázádaga luossajogain leat goddon dán geasi erenoamáš ollu ruoššaluosat.
– Dán rádjái leat dieđihuvvon 1141 ruoššaluosa goddon dábáláš bivddus, muitala Deanučázádaga Guolástanhálddahusa (DG) ráđđeaddi, Narve Stubbraaten Johansen.
– Mii vuordit vel raporttaid ja doaivut ahte obbalaš sálaš, ovttas Suoma loguiguin, šaddá gaskal 2000-3000 indiviidda, muitala Johansen.
Dehálaš raporteret
Sidjiide lea dehálaš oažžut buot raporttaid sisa, main boahtá ovdán guđe jogas ja galle ruoššaluosa leat goddon. Son muitala ahte báikkiin leat sonárat mat lohket luosaid, muhto dat eai earut lea go ruoššaluossa vai dábáláš luossa.
– Dan dihte lea erenoamáš dehálaš raporteret ruoššaluosaid maid olbmot leat goddán, maiddái luossanáli bearráigeahču dihte.
Ruoššaluosat gođđán jo
Deanučázádaga Guolástanhálddáhus (DG) lea ožžon lobi ja ruhtadeami goddit ruoššaluosaid Deanočázádagas. Maŋimuš beivviid leat sii iskkan Deanu Šalddi lagašbáikkiid, ja kárten gođđobáikkiid bajábealde skihpaguraguoikka ja vuolábealde Sieiddaguoikka.
– Gođđin lea álgán dáin báikkiin, ja dan moadde indiviida maid leat goddán dán radjai ledje jo gođđán, muitala Johansen.
Kártejit
Dáid beivviid sii johtet ja kártejit helikopteriin Deanučázádaga gođđobáikkiin, ja seammás lohket gođđoguliid. Soames johkabivdit leat maid ožžon gáržžiduvvon fierbmebivdolobi mas guollebivdobearráigeahčči galgá mielde. – Mihttu guollebivdduin lea viežžat guoli eret ja kártet gođđobáikkiid. Dál lea dat deháleamos go leat nu maŋŋit jođus, muitala Johansen.
Viežžanlohpi
– Ruoššaluossa vállje measta álot gođđit seamma báikái daid jagiid go boahtá. Kárten álkidahttá sin barggu jus boahtte háve bohtet nu olu ruoššaluosat joga mielde bajás, muitala Johansen. – Fierbmebivddu bokte oahppat mo čađahit beaktilis guollebivddu ná stuorra jogas go Deanučázádat lea. Dál leat ožžon viežžanlobi Norgga beale čázádagas, ja sávvamis ihttin beassat viežžat rádjaguovllus maid, muitala Johansen.
Unnán raporttat Kárášjogas
Ruoššaluossa doallá rievtti mielde vuolit oasis čázádagain, muhto čájehuvvo ahte Deanučázádagas ii leat nu, go ruoššaluosaid leat goddán maiddái rádjaguovlluin.
– Diehtit lohkama oktavuođas ahte ruoššaluossa goargŋu Anárjohkii. Loahpageahčen suoidnemánu manai luossaspierru mas lei rievttes sturrodat Kárášjoga sonára meattá. Vaikke leat unnán raporttaid ožžon doppe, de diehtit ahte ruoššaluossa lea gávdnamis badjin Deanučázádagas, muitala Johansen.