Áltá ovdagovvan buot suohkaniidda
Gaskavahku lei mearkabeaivi Álttás go suohkan rabai áibbas ođđa sámi mánáidgárddi. Dál eai dárbbaš mánát šat leat vuordinlisttus beassat sámegiel mánáidgárdái.
Dán rádjái lea priváhta mánáidgárdi Álttá siida leamaš áidna sámi mánáidgárdi ja vuordinlistu dohko lea guhkkon jagis jahkái. Suohkan lea guokte maŋemus jagi gal doaimmahan Álttá siiddas ovtta ossodaga, muhto dál leat rahpan sierra mánáidgárddi, Guovddáš mánáidgárddi, hui lahka Álttá gávpotguovddáža, «City».
Dat lea dieđus illusáhka sámi mánáide ja sin váhneimiidda, go Finnmárkku stuorámus gávpogii lea ásahuvvon sierra sámi suohkan. Áltá lea ge stuorebuš báiki guovddáš Sámis ja doppe orrot ge olu sápmelaččaid geain leat mánát mánáidgárdeagis. Eahpitkeahttá lei Álttás stuorra dárbu sierra sámi mánáidgárdái, ja lea ge buorre ođas sámi váhnemiidda ja mánáide. Áltá lea okta dain stuorebuš čoahkkebáikkiin Norggas gos ásset eanemus sápmelaččat. Dan dáfus lea dehálaš ahte sámi mánát ožžot sámegielfálaldagaid juo unnivuođa rájes. Lea oahpes ášši ahte smávva gielat ja kultuvrrat jođánit goarránit majoritehtaid kultuvrraid ja gielaid searvvis, jus daidda eai geavahuvvo návccat.
Áltá lea ge buorre ovdagovva buot suohkaniidda Norggas, gos orrot sámi bearrašat, ahte lea vejolaš ásahit sierra mánáidgárddi dušše sámi mánáid várás.
Áltá lea ge buorre ovdagovva buot Norgga suohkaniidda, gos orrot sámi bearrašat, ahte lea vejolaš ásahit sierra mánáidgárddi dušše sámi mánáid váras. Mánáidgárddit leat ge dehálaččat mánáid giela ja kultuvrra seailluheami oktavuođas. Dađi bahábut leat dál stuora erohusat báikkis báikái makkár mánáidgárdefálaldaga sámi mánát ožžot. Muhtun báikkiin ii oba juolo ge buot sámi mánáide sadji sámi mánáidgárdái. Ávvir lea ovdal maid čállán olu daid áššiid birra, go sámi váhnemiid fuolastuvvet go leat šaddan bidjat mánáid mánáidgárddiide gos dárogiella lea beaivválaš giellan.
Sámegiela seailluheami dáfus sáhttet das leat stuora váikkuhusat mánáide geat eai oaččo sámi mánáidgárdefálaldaga. Dat lea duohta ballu, ahte jus sámi mánáide eai leat unnivuođa rájes juo sámegielfálaldagat, de sáhttá giella loahpas jávkat oalát. Giela ferte ge nannegoahtit mánáin nu árrat go vejolaš. Mánáide, geat orrot servodagain gos dárogiella lea váldogiellan, lea mánáidgárdi dan dáfus hui guovddáš ja mávssolaš giellaseailluheaddji. Mánát leat sámegiela boahtteáigi ja jus sámegiela galgá gáhttet, seailluhit ja ovdánahttit, de ferte buot surggiin servodagas bargat dáinna. Lea ge rámidan veara go Álttá suohkan lea dál ásahan sierra sámi mánáidgárddi.