Diggái go dearpalii ákšuin nuppi oaivái
Golggotmánu loahpageahčen deaivvadeaba áššáskuhtton dievdu ja gillájeaddji Sis-finnmárkku diggegottis.
Vuollel vihttalot-jahkásaš almmái lea áššáskuhtton Ráŋggáštuslága § 274 vuođul go galgá roavvásit roasmmehuhttán nuppi rupmaša.
Roasmmehuhttin lea roavis go deaddu biddjo dasa ahte gillájeaddjis leat leamaš garra bákčasat ja lea bahuid roasmmehuvvan. Dat go lea earenoamáš váralaš reaidduin huškkastan, lea maid guovddáš čuokkis, čuožžu áššáskuhttimis.
Almmái lei álggos áššáiduhtton geahččalan goddit gillájeaddji, muhto dán leat áššáskuhttimis rievdadan, go dán paragráfa eavttut eai leat ollašuvvon.
Dearpalan máŋgii
Dáhpáhus galgá dáhpáhuvvan Anárjoga guovllus, Kárášjoga gielddas, borgemánu 31. beaivvi diibmá.
Áššáskuhtton dievdu galgá dearpalan máŋgii ákšuin, nu ahte gillájeaddji jámálgii. Gillájeaddjis ledje golbma hávi oaivvis dasa lassin go oaiveskálžu luoddanii. Gillájeaddji oaivvis šadde goarrut gaskal 25 ja 30 sákkaldaga, dasa lassin go su oaivái šadde bidjat vihtta metállabihtá.
Bargonávccahisvuohta
Diggi bidjá maid deattu dasa ahte gillájeaddji roasmmehuvai nu bahuid ahte lei sáhttit dagahit bargonávccahisvuođa dahje ahte almmái lei šaddat guhkit áiggi buohccindieđihuvvon.
Ráŋggáštuslága § 274 ráŋggáštusrádjá lea logi jagi rádjái giddagasas, dasa lassin ferte áššáskuhtton dievdu dohkkehit ahte ákšu duoguštuvvo.
Heahtegádjun gažaldat
Áššáskuhtton dievddu advokáhtta Hans Arne Nysaeter dadjá ifinnmark:i ahte áššis šaddá gažaldat heahtegádjuma birra.
– Dán áššis šaddá heahtegádjun gažaldat. Duohta dilálašvuođat leat čielgasat áššis, ja de šaddá digaštallan dearpaluvvui go oktii vai guovtte geardde. Áššáskuhtton almmái čuoččuha ahte son lei heahtegádjundilis, ja de lea diggegoddi mii ferte veardidit mii dáhpáhuvai, dadjá Nysaeter. Ávvir ii ožžon advokáhtaid ságaide dán áššis.