BEARE ÁRRAT
– Rievssatbivdu
Čakčamánu logát beaivi lea smávvafuođđubivdiid stuorámus beaivi, go dan beaivvi rájes lea lohpi bivdit rievssahiid, gironiid, beahcelottiid ja njoammiliid. Finnmárkkuopmodat (Fefo) dieđiha ahte 2019/2020 áigodagas lea beaiveearri golbma rievssaha beaivái dahje oktiibuot 30 rievssaha dán dálvvi.
Per Jernsletten mielas álgá rivssat bivdu beare árrat.
– Leat ain binna bánna viehkki čivggat, na dat mat eai nagot girdit. Mun lean váccašan ja geahčadan mo dilli lea. Ii leat go vahkku áigi go oidnen rievssatčivggaid mat ain vihke, eai lean vuos girdilan. Dat leat maŋŋonan, lohká eallilan rievssatbivdi, kárášjohkalaš Per Jernsletten.
Jáhkimis lea dábálaš rievssatjahki
NINA dahje Norgga Luonddudutkaninstituhtta dieđiha preassadieđáhusas ahte Mátta-norggas lea heajos rievssatjahki ja davimus Norggas lea dábálaš rievssatjahki, ii heajos, iige buorre. Rievssatlohkan Sis-finnmárkkus 2019 lea 12,4 rievssaha, heajumus jagi 2017 ledje guokte rievssaha ja buoremus jagi 2016 ledje 16,1 rievssaha.
– Mo bat lei diibmá, jagi 2018? 9,7 rievssaha rehkenaste lea guovllus, muhto dalle ledje sii lohkan 3, 5 juohke kilomehteris. Ja dál 12,4 rievssaha. Diet gal doallá hui bures deaivása. Go beare rivttes áiggi lohket daid rievssahiid, ahte eai leat menddo báhkat vai beatnagat hakset. Ja ahte maŋidit jus lea menddo báhkka árra borgemánu, lohká Per Jernsletten.
Biebmu boraspiriide ja gazzalottiide
Rievssatbivdi Per Jernsletten muitala ahte soai beatnagiin, «Skivir» nammasaš beatnagiin, leaba fitnan meahcis olles geasi geahččamin mo rievssatbessemiin manná.
Meahcis lea son oaidnán valjis váras sáhpánbálgáid ruossut rássut mannamin nu ahte boraspiriide ja gazzalottiide galggašii leat biebmu gávdnamis. Son lea dán jagi maid oaidnán rievssatbeassádaga mas ledje gávcci rievssatčivgga lahka rievssatfálli beasi, muhto daid gal jáhkká gazzalotti doalvut ovdal go rievssatbivdu álgá.
– Dál go fitnen doppe fas, de ledje dušše moadde čivgga velá báhcán, lohká Per Jernsletten.
Báhcán okto bivdit
– Mun gal dábálaččat álggán easkka čakčamánu 15. beaivvi. Kárášjoga gielddas lea vuovdi ja lasttat gahčamin ná arrat ja rievssat leat nu hiras dalle. Amma juo eambbo go golbma rievssaha bážán juovllaid rádjái. Mus lávejit juovlamállásat álo masa mannet nuppelohkái rievssaha. Amma juo dan gal fertešin fitnet. Mun jurddašan ieš málesdoarvvi báhčit, lohká eallilan kárášjohkalaš, rievssatbivdi Per Jernsletten.
Veahkin dasa lea su buoremus bivdoskihpár, «Skivir» nammasaš iralaš setter loddebeana, ain virkui ja buori vuoimmis vaikko lea 11 jagi boaris. Per Jernsletten lohká dál boarásmanbeaivái ii mana nu guhkás go ovdal lávii.