SÁMEDIGGI OHCÁ pilohtamánáidgárddiid
Dál sáhttet sámi mánáidgárddit ovddidit pedagogihka ja bargovugiid go Sámos-prošeakta almmuha vejolašvuođa ohcat pilohtamánáidgárdin.
Sámos-prošeakta lea plánejuvvon viđa jagi badjel ja lea Sámediggi mii jođiha prošeavtta. Ulbmil lea sámáiduhttit mánáidgárddiid miehtá Sámi. Dál almmuha Sámediggi vejolašvuođa mánáidgárddiide ohcat pilohtamánáidgárdin.
– Dát šaddá lagas ovttasbargu Sámedikki ja mánáidgárddiid gaska, dadjá sámediggeráđđi Mikkel Eskil Mikkelsen.
Dutkanbargu
Ulbmil pilohtamánáidgárdebargguin lea hábmet pedagogihka ja ovddidit bargovugiid sámi vuođđojurdagiid mielde.
– Prošeakta lea boahtán dan rádjai ahte galgá šaddat dutkanbargu ovttas Sámi allaskuvllain. Mánáidgárddiin šaddá njulges gulahallan dutkamiin, ja mánáidgárddit mat servet galget gaskaneaset sáhttit gulahallat, čilge Mikkelsen.
Galggašii ávkkástallat
Mikkel Eskil Mikkelsen dadjá dát lea fálaldat maid sámi mánáidgárddit galggašii ávkkástallat:
– Fálaldaga galggašii sámi mánáidgárddit ávkkástallat. Prošeakta lea dehálaš Sámediggái, ovddidan dihte sámi bargovugiid ovttas sámi mánáidgárddiiguin. Mikkelsen deattuha ahte gulahallan sihke dutkanbarggu, mánáidgárddiid ja Sámedikki gaska lea guovddážis.
Háliidit mánáidgárddiid juohke guovllus
Mikkelsen dadjá maid ahte giellabargu vuoruhuvvo olu, ja sii sávvet ahte mánáidgárddit sihke siseatnamis ja riddoguovlluin ohcet pilohtamánáidgárdin.
– Ohcamat eai leat vel ollen boahtit, muhto mii háliidit ahte sihke davvi-, julev- ja lullisámegielat mánáidgárddit ohcet. Nu beasašeimmet dutkat ja ovddidit buot sámi guovllu mánáidgárddiid, dadjá ráđđelahttu.
– Šaddá miellagiddevaš
Preassadieđáhusas čuožžu ahte álgovuorus biddjojit njeallje mánáidgárddi johtui dáinna bargguin, ja lasihuvvojit eanet mánáidgárddit áiggi mielde. Ohcanáigi lea golggotmánu 15. beaivvi.
– Šaddá miellagiddevaš čuovvut pedagogalaš ovdáneami dán prošeavttas, loahpaha Mikkelsen.