Gonagas lokte árvvu sámegielas

Dál lea dieđihuvvon ahte Majestehtalaš Gonagas Harald áigu searvat sámi giellavahkku lágidemiide Kárášjogas golggotmánu 24. beaivvi. Gonagas áigu earret eará galledit Kárášjoga vuođđoskuvlla ja juohkit Giellaloktema giellabálkkašumi. Duogáš sámi giellavahkkui lea sámegielaid oainnusmahttit oppa servodagas. Sámediggi lea ávžžuhan priváhta ja almmolaš aktevrraid, ealáhusaid, organisašuvnnaid ja báikkálaš aktevrraid searvat dán gelddolaš bargui. Lea ge áibbas ođđa giellabálkkašupmi, mainna Sámediggi háliida gudnejahttit aktevrraid, ealáhusaid dahje servviid mat leat mielde sámegiela oainnusmahttimis báikkálaččat ja našuvnnalaččat. Dan bálkkašumi geige ge ieš Gonagas Harald.

Dat eahpitkeahttá lokte árvvu sámegielas go Gonagas Harald, gii lea Norgga bajimus oaivámuš, searvá daidda doaluide go sámegiella vuoruhuvvo sierra vahkkun. Danne lea ge Gonagas Harald mielde ovddideame sámegiela, go lea miehtan searvat dasa. Áiggiid čađa lea gonagasbearaš čájehan ahte sii atnet árvvus sápmelaččaid ja maiddái sámegiela. Ovdamearka dihte muitit mot Norgga prinseassa Märtha Louise 2001:s logai máidnasa sámegillii Ájánas mánáidgárddis Leavnnjas. Dan oktavuođas dajai son «dat manai bures, muhto dat hal vel livččii ge váilon nu ollu go lean hárjehallan». Prinseassa Märtha Louise sánit 18 jagi dás ovdal berrejit ge leat muittuhussan ja movttiideapmin ahte sáhttá hárjehallat ja oahppat sámegillii juoidá muitalit. Dál fas lea gonagasbearaš lokteme árvvu sámegielas, go Majestehtalaš Gonagas

Harald searvá sámi giellavahkku lágidemiide.

Dat eahpitkeahttá lokte árvvu sámegielas go Gonagas Harald, gii lea Norgga bajimus oaivámuš, searvá daidda doaluide go sámegiella vuoruhuvvo sierra vahkkun.

Sámegiella dárbbaša ge dákkár doarjagiid, maiddái go dat lea giella mii lea rašis dilis. Erenoamážit dat smávva sámegieljoavkkut leat hirbmat rašis dilis. UNESCO mielde leat julev- ja máttasámegielat garrasit áitojuvvon, maid ballet jávkat. Muhto nuortalašsámegiella ja maiddái mearrasámiid suopman leat sámegieljoavkkut mat measta oalát leat jávkan Norgga bealde. Lea ge illusáhka go Gonagas Harald searvá giellavahkkui, go dat addá lassi doaivaga ahte sámegielas lea boahtteáigi. Mii diehtit ahte sámegieljoavkkut, earenoamážit dat unnit joavkkut, leat hui rašes dilis. Lea ge dehálaš ahte sámegieloahpahus fállo mánáidgárddiid rájes gitta alla skuvllaid ja universitehtaid rádjai. Das dieđus ferte leat olles servodat mielde ja ruhtadeaddji eiseválddit, nu go Stuorradiggi, ferte láhčit ja vuoruhit sámegiela ovdáneami.