Alkoholavuovdin lea veahá lassánan
Norggas lea alkoholavuovdin lassánan 0,2 proseanta. Dán čájehit logut vuosttaš jahkebealis 2019:s, buohtastahtton diimmá SSB loguiguin.
Lassáneapmi lea 28 000 alkoholalihttera. Oktiibuot jođihuvvui 12 605 000 alkoholalihttera dán áigodagas. Dát šaddá 2,87 alkoholalihtter juohke ássái.
Vuovdaleapmi buolliviinnis ja viinnas lea lassánan, dan botta go vuolla- ja rusbruvsavuovdaleapmi lea njiedjan. Jus mihtida alkoholavuovdaleami gálvolihtteriin, de lea leamaš unnideapmi 0,84 proseanttain vuosttaš jahkebealis 2018:s.
Dasa lea sivva dat go gálvvut main lea alit alkoholaproseanta, nu go viidna ja buolliviidni, leat lassánan, dan botta go vuovdaleapmi rusbruvssas ja vuolas lea njiedjan.
Buolliviidnevuovdaleamis lea leamaš stuorámus lassáneapmi vuosttaš jahkebealis, 139 000 lihtteriin. Dát lea 2,91 proseantta lassáneapmi diimmá ektui.