Šaddaba diggái giđđaloddenáššiin
Guokte birrasii guoktelot-jahkásaš Guovdageainnu bártni leaba áššáskuhtton lobiheamet báhčán čáhcelottiid.
Luondduriggodatlága § 75 vuođul leaba soai dál áššáskuhtton go galgaba miessemánu 19. beaivvi báhčán lottiid maid ii lean lohpi báhčit. Albmáguovttos galgaba báhčán unnimus guhtta njurgo Guovdageainnu suohkanis.
Njurggu lea ráfáiduhtton loddi measta miehtá Norgga, ja lea dušše Østfoldas lohpi bivdit dan.
Giddagas ja sáhkku
Jus rihkku luondduriggodatlága, de sáhttá sáhkkohallat ja šaddat giddagassii jahkái.
Áššáskuhttieiseváldi gáibádus lea ahte albmáguovttos massiba iežaska hávláriid dasa lassin go massiba bivdolobi.