Gonagas searvá sámi giellavahku čalmmusteapmái Kárášjogas
– Mu váimmu ligge dat go justa gonagas lei okta vuosttažiin geat čájehedje beroštumi min ávžžuhussii searvat sámi giellavahku čalmmusteapmái, ja mii illudit hui sakka gonagassii čájehit barggu maid báikkálaččat dahket Kárášjogas sámegiela oainnusmahttimis
Sámediggái lea stuorra illu go beassá muitalit ahte Gonagasviessu lea háliidan searvat sámi giellavahku čalmmusteapmái. Majestehtalaš Gonagas Harald áigu searvat sámi giellavahku lágidemiide Kárášjogas golggotmánu 24. beaivvi.
Gonagas áigu earret eará galledit Kárášjoga vuođđoskuvlla, ja juohkit Giellaloktema giellabálkkašumi. Lea áibbas ođđa giellabálkkašupmi mas Sámediggi háliida gudnejahttit aktevrraid, ealáhusaid dahje servviid mat leat mielde sámegiela oainnusmahttimis báikkálaččat ja našuvnnalaččat.
– Mun sávan ahte buohkat, nu go Majestehtalaš Gonagas Harald, vulget sámi giellavahku čalmmustahttit ja searvat lágidemiide, čállá Aili Keskitalo preassadieđáhusas.
Eanetlohkogiella
Sámediggi lea vuolggahan našuvnnalaš sámi giellavahku mii dollojuvvo golggotmánu 21.-27. beaivvi. Sámi giellavahkku lea Sámedikki guhkesáiggi áŋgiruššama – Giellaloktema oassin, ja lea maid Sámedikki ON riikkaidgaskasaš eamiálbmotgielaid čalmmusteami oassin – IYIL19.
– Sámegiella lea Kárášjogas eanetlohkogiella, muhto dattetge oaivvildit ahte lea deaŧalaš sámegiela oainnusmahttit sihke gávppiin, mánáidgárddiin, skuvllas ja muđui gielddas. Mii illudit Majestehtalaš Gonagassii čájehit barggu maid dahkat sámegiela bealis Kárášjogas, lohká sátnejođiheaddji Svein Atle Somby.
Ávžžuhan searvat
Duogáš sámi giellavahkkui lea sámegielaid oainnusmahttin oppa servodagas. Sámediggi lea ávžžuhan priváhta ja almmolaš aktevrraid, ealáhusaid, organisašuvnnaid ja báikkálaš aktevrraid searvat dán gelddolaš bargui.
– Mii leat ávžžuhan lágidit čalmmustemiid, aktivitehtaid ja eará doaibmabijuid vai sámegiella oainnusmahttojuvvo, čállá Sámediggi.
Sámi giellavahkus šaddet ollu iešguđetlágan lágideamit ja aktivitehtat riikka iešguđet báikkiin, ja maiddái Suoma beale Sámis.
– Iešguđet lágidemiid prográmma riikka iešguđet báikkiin eai leat vuos gárvásat, muhto orru leamen stuorra beroštupmi sámi giellavahku čalmmustahttit, ja mii vuordit ahte šaddet mealgat lágideamit. Mun illudan hui sakka, ja Sámediggeráđđi áigu searvat nu ollu lágidemiide go vejolaš, dadjá Keskitalo vel loahpas.