MÁLESTII BOHCCOBIERGGU Norgga stuorámus biepmofestiválas
Eanadoallo- ja biebmoministtar
Eanadoallo- ja biebmoministtar málestii bohccobierggu Norgga stuorámus biepmofestiválas go galledii «Rein – helten på vidda» biepmotealttá.
Eanadoallo- ja biebmoministtar málestii bohccobierggu Norgga stuorámus biepmofestiválas go galledii «Rein – helten på vidda» biepmotealttá. John Anders Lifjell lea duhtavaš go nu olus leat galledan biepmotealttá dán jagi ja «Rein – helten på vidda» lea ge bivnnut biepmofestiválas. Mannan vahkkoloahpa lágiduvvui Norgga stuorámus biebmofestivála, Matstreif Oslos. Innovašuvdna Norga lágida Matstreif biebmofestivála juohke jagi ja dál leage 15. jahki go festivála lágiduvvo. Biepmofestiválii mannet ge maid bohccobiergofitnodagat márkanfievrridit vuosttažettiin bohccobierggu, muhto maiddái sámi kultuvrra.
Oahpai ráhkadit suovasbierggu
Dán jagi oaččui «Rein – helten på vidda» biebmotealtá guossin Norgga Eanadoallo- ja biebmoministtara, Olaug Vervik Bollestad. Son beasai oahppat mo ráhkadit suovasbierggu.
– Dat lei erenoamáš njálggat ja lei issoras álki ráhkadit. Vuos ferte báistit bierggu vuojas, ráhkadit rušpipuree ja bidjat mástašattuid oktan biergguin ovtta wrappii, muitala Eanadoallo- ja biebmoministtar, Olaug Vervik Bollestad, mo son oahpai ráhkadit suovasbierggu.
Loktet ealáhusa
Eanadoallo- ja biebmoministtar dadjá ahte bohccobiergu lea dehálaš biepmobuvtta. Son čilge ahte bohccobiergu lea borramuš mas olmmoš ádde dan geavaheami ja ávkki. Bohccobiergu lea dehálaš sihke kultuvrii ja árbevieruide.
— Mus lea stuorra beroštupmi badjeolbmuide ja sin árbevieruide. Lea dáhttu loktet dán ealáhusa ja de lea biergoprodukšuvdna hui dehálaš, danne lei munnje dehálaš boahtit deike, lohká Eanadoalloja biebmoministtar, Olaug Vervik Bollestad.
Njálgga biergu
Maiddái Oslo gieldda sátnejođiheaddji Marianne Borgen lei boahtán galledit «Rein – helten på vidda» biebmotealttá ja son muitala son lea ovdal máistán bohccobierggu, muhto ii goassige ráhkadan dan ieš.
– Dat lea hui njálgga biergu ja lea somá oaidnit ahte eanadoalloja biebmoministtar nákcii nu bures ráhkadit suovasbierggu, lohká sátnejođiheaddji Marianne Borgen. Son lea ilus go lágiduvvo ná stuorra biepmofestivála gávpogis, gos beassá máistit borramuša miehtá Norgga.
Dehálaš leat dáppe
John Anders Lifjell ovddastii bohccobiergo márkanfievrrideamilávdegotti biepmofestiválas ja son ovddidii «Rein – helten på vidda» biebmotealttá festiválas. Son lohká ahte lea issoras dehálaš leat Norgga stuorámus biepmofestiválas.
– Mii oaidnit man dehálaš dat lea leat dáppe. Mii ráhkadit veaháš biepmu ja olbmot besset dan máistit, vuoi sii maŋŋelaš mannet buvddaide oasttit buktagiid, dadjá John Anders Lifjell.
Bivnnut festiválas
Son muitala «Rein – helten på vidda» biebmotealtá lei bivnnut festiválas ja leat olu olbmot geat čoahkanit tealtái geahččat, máistit ja háleštit olbmuiguin geat ovddastit bohccobierggu tealttás.
– Dát lea bivnnut ja nu lea ge leamaš dál moadde jagi, dat čájeha dan dehálašvuođa leat dáppe. Lea maiddái somá go oaččuimet guossi stáhtaráđis, gii maiddái čájehii man álki dat lea ráhkadit bohccobierggu, lohká John Anders.
Nuorat mielde čalmmustahttime bohccobierggu
John Anders muitala ahte lea buorre ahte sis leat nuorat mielde geat ovddastit bohccobierggu ja geain lea duogáš badjedoalus. Su mielas lea dehálaš ahte sis leat mielde olbmot geat dovdet badjeolbmo árgabeaivvi ja máhttet muitalit dan birra. Ina-theres Sparrok ja Sara Katrine Aleksan
dersen leaba guokte dain nuorain geat leaba mielde.
– Dat leat issoras olus geat bohtet deike ja ostet biepmomáisttu. Mun dieđán dat lea njálggat ja mun doaivvun ahte go olbmot besset máistit bierggu de ožžot miela oastit eambbo bohccobierggu. Mun doaivvun dan ja lea leamaš buorre responsa olbmuin, dadjá Ina-theres Sparrok.
– Lean mielde čalmustahttime bohccobierggu. Jus mii eat ovddit bohccobierggu de eat ovdán, danne lea ge dehálaš vuolgit čájehit bierggu. Dáppe lea hui somá leat, deaivat olu olbmuid ja beassá olu muitalit, lohká Sara Katrine Aleksandersen.
Čuohteduhát olbmo
Dán jagi leat 170 biepmobuvttadeaddjit čájeheamen sin buktagiid Matstreif biepmofestiválas ja lágideaddjit einnostit ahte ledje badjel 100 000 olbmo geat gallededje biepmofestivála dán jagi. John Anders Lifjell lea duhtavaš go nu oallugat leat galledan sin biepmotealttá dán jagi maid.