Váivi go ii dieđe maid bargá gol ggotmánu rájes
Julevsámi girjebusse heaittihuvvo čakčamánus dan sivas go Sámediggi ii šat doarjjo girjebussiid. Rune Knutsena bargodilli lea dál stuora gažaldatmearka.
Divttasvuona suohkan dat eaiggáduššá busse mas leat leamaš 2,5 virggi, vuoddji, bibliotehkára ja vel kánturbargi beallevirggis.
18 jagi vuodján
Rune Knutsen (58) lea bargan busses dan rájes go dat álggahuvvui 18 jagi áigi. Diibmá golggotmánus manai bibliotehkára ealáhahkii, ja dan rájes lea Knutsen okto johtán bussiin. Su mielas lea hui vahát go girjebussefálaldat heaittihuvvo dán mánus.
– Ii leat fávdnát, lea juo váivi. Mun han lean čađat vuodján dáinna bussiin. Lea váttis diehtit maid dál galggan bargat, go in leat ožžon eambbo go njálmmálaš dieđuid dan birra, dadjá Knutsen Ávvirii.
Divttasvuona suohkan dat eaiggáduššá busse ja bargit leat suohkana bargit. 2018:s lei dán busse bušeahtta lahka 2,1 miljovnna ruvnno. Sámediggi doarjjui das 1,64 miljovnna, Norlándda fylkkasuohkan 155 000 kr ja ovttasbargosuohkanat ges 71 500 kr. Jagi áigi mearridii Sámediggi ahte heaittihit doarjaga girjebussiide, dahje ahte eai doarjjo eambbo go 500 000 ruvnno jahkái.
Ruhta ii ole vaikko unnidit
Divttasvuona suohkana kultur-, ealáhus- ja ovdánahttinovttadaga hoavda Lars Filip Paulsen lohká sin fertet gávdnat čovdosa ovdal go suohkan juohkása guovtti sadjái, ođđa Áhkánjárgga ja ođđa Hápmira suohkaniidda ođđajagis 2020.
– Jus mii vuolidit goluid buot vuolimussii ja jus Sámediggi addá 500 duháha, ja muđui suohkanat ja fylkkasuohkanat doalahit seamma doarjaga, de váilu mis goitge vel 600 duhát ruvnno. Mii leat gulaskuddan ođđa suohkaniiguin Áhkánjárggain ja Hápmiriin, muhto leat ožžon signálaid ahte eai hálit váldit badjalasaset doaimma. Dál leat hástán Sámedikki veahkkin ođđa strategiijaid hutkat, dadjá Paulsen.
Eai mávsse riikkaidgaskasaš fálaldaga
Julevsámi girjebusse vuodjá gávcci suohkanis, Divttasvuonas, Hápmiros, Bådådjos, Fuoskus, Sørfoldas, Evenáššis ja Áhkánjárggas, ja maiddái Jielleváris Ruoŧa bealde. 2011:s mávssii Sámediggi 2,86 miljovnna oastit ođđa busse, dainna eavttuin ahte galgá doaimmas 2020 rádjái. Muhto suohkan ii nagot jagi vel doaimmahit busse Sámedikki doarjaga haga.
Paulsen ii loga suohkaniid bargun váldit regionála ja riikkarasttildeaddji fálaldaga. Son lea sámediggepolitihkkár maiddái Olgešbellodagas, ja atná Sámedikki mearrádusa heittogin.
– Lea váivi ja šállošahtti go ná lea šaddan, go girjebusse doaibmá hirbmat bures ja mii leat bargan buot maid sáhttit bisuhit girjebusse. Lean čađat vuosttaldan heaittiheami, go mis leat stuora rašes giellaguovllut gos leat guhkes gaskkat. Dás leat maid leamaš dehálaš julevsámi bargosajit ja mávssolaš fálaldat, dadjá Paulsen.