– RISSI jienastedjiin
Válggat leat čielgan Guovdageainnus ja doppe leat vuoitit ja vuoittáhallit. Okta vuoittáhalliin lea Bargiidbellodat, mii manáha badjel beali áirasiin.
Go seavdnjat luoitádii Guovdageainnu badjel ikte eahkes, de álge čielgat válgabohtosat. Muhtumat illudedje, muhtumat fas geahččaledje doalahit movtta ja muhtumiin eai lean šat vuordámušat.
Guovdageainnu Dáloniidlisttu šadde válgavuoitit ja ožžo 26,2 proseantta jienain. Dat mielddisbuktá ahte sidjiide leat várrejuvvon vihtta saji suohkanstivrras, ja leat dakkobokte Guovdageainnu stuorimus bellodat.
Guovdageainnu Bargiidbellodat ožžot várra dovdat iežaset behtohallan jienastedjiid dáfus. Sii ledje Guovdageainnu stuorimus bellodat 2015:i válggaid oktavuođas, de leat sii dál gasgeardán stuoro bellodat.
Sii masse golbma viđá áirasis, ja leat diehttelasat dainna duhtameahttumat ja dovdet behtohallan.
Rissi
Válgagoziheami ledje eanas bellodagat válljen galgá leat Pitstop nammásaš boradanbáikkis. Buohkat ledje doppe earret Sosiálisttalaš gurutbellodat ja Guovdageainnu dáloniidlisttu.
Go Ávvir joavddai válgagozihanbáikái mánnodaga maŋŋel go jiensteapmi lei čielgan, de lei Bargiidbellodaga sátnejođiheaddjiáirras juo guođđán báikki. Dálá sátnejođiheaddji, Johan Vasara, deaivvaimet uvssas manname ruoktot.
Áidna gii lei báhcán lei nubbinevttohas, Inger Marit Bongo. Son šattai váldet dan bahča jearahallama Ávviriin ja dovddastit ahte leat vuoittahallan
– Mun lohken ovdal válggaid ahte dát válggat bohtet čájehit man duhtavaččat olbmot leat min bargguin. Dan mii oaidnit dál ahte eai leat. Mii leat seasttán suohkanis rievttesláhkai, nu leat maid beassan eret Robeklisttus. Seammás letnet čohkken kontui moaddelogi miljovnna vuoi galgat beassat fas vuoruhit doaimmaid, muhto de oažžut rissi bahti, lohká Bongo.
Moaitagiid ožžon
Bongo mieđiha maid Ávvirii dál ahte son lea ožžon moaitámušaid olbmuin válgagičču oktavuođas, ahte eai leat duhtavaččat.
– Juo, mun lean ožžon moaitagiid olbmuin geat leat duhtameahttumat movt mii leat vuoruhan diŋggaid ja maid leat vuoruhan. Dá lea jienasteddjiid duopmu midjiide, lohká Bongo
– Mii eat leat duhtavaččat
Válggas čájehuvvui ahte Guovddášbellodat lei gievra ja Johtiidsámiid listu lea ribahan dohko ollu jienaid.
Johtiisámiid listu njunuš, Anders S Buljo, dadjá ahte eará bellodagat leat bargan buori válgabarggu.
–Mun oainnán ahte mii leat massan 120 jiena, muhto doppe leat vel ovddalgihtijienat mat eai leat vel lohkkon.
Son čilge maid ahte leat dáinna bohtosiin massan eanetlogu ja ahte sii dal fertejit gávdnat ođđa ovttasbargoguimmiid jus galget eanetlogu ásahit. Ovttas Guovddášbellodagain ja Bargiidbellodagain šaddet ovcci áirasa oktiibuot.
–Mii dárbbašit ovtta vel vai oažžut eanetlogu. Mus lea dal geatnegasvuohta álgit bargat ovttatmano, vai olahit eanetlogu. Mun ferten dál gođđit čoahkkái juoida ja mun lean gearggus dasa, dadjá Johttisámiid njunuš Anders S Buljo