DUĐAVAŠ, vaikke orrot massimin áirasa
Measta visot Deanu jienain leat lohkkon ja Bargiidbellodat lea ožžon 39,3 proseantta jienain. Njunuš lohká dál álgá dat deháleamos bargu, šiehtadallamat eará bellodagaiguin.
– Lean hui duđavaš dássážii, ja jus dát šaddá boađusin, de lean hui duđavaš, logai Deanu Bargiidbellodaga sátnejođiheaddjeevttohas Helga Pedersen diibmu 21.15 vuossárgga eahket, maŋŋel go álgobohtosat almmuhuvvojedje.
Loguid mielde de lea Bargiidbellodat ožžon gávcci áirasa gielddastivrii, mannan válggas ožžo ovcci.
– Joatkit ovttasbargguin
Helga Pedersen ii leat eahpádusas, dá lea máilmmi buorre boađus su mielas.
– Mii leat nu ilus dál, mii giitit buohkaid geat leat min jienastan. Dál lea báhcán hui dehálaš oassi válggas, namalassii šiehtadallat eará bellodagaiguin vai oažžut eanetlogu, dadjá Helga Pedersen. Son čujuha válggagižžui mas leat dadjan ahte Deanu sámelistu ja Sosialisttalaš Gurutbellodat leat bellodagat maiguin Bargiidbellodat háliida ovttasbarggat.
– Mii háliidat joatkit ovttasbarggu singuin, muhto eat leat gidden uvssa Guovddášbellodahkii. Mii fertet dál čohkkedit ja digaštallat siskkáldasat, lohká Pedersen. Vuossárgga ledje Deanus eanas jienat jo lohkkon, eai dušše ovdagihtii jienat.
Vuollelis áššis oainnát Deanu bohtosiid muđuid.
Muhtun muddui duđavaš
Deanu Guovddášbellodat (Gb) beassá njeljiin áirasiin gielddastivrii, mii lea beali eambbo go mannan áigodagas. Sii ledje ge sávvan unnimusat duppalastit áirraslogu. Dálá loguid mielde oaččui Gb 19,5 proseantta jienain.
– Mii leimmet sávvan gaskal 4-6 áirras, ja dál fidnet njeallje ja dáinna ferte leat duđavaš. Eat juksan mihttomeari mii lei 400 jiena, dadjá Jon Erland Balto váile logis vuossárgga eahkeda go Ávvir čuojahii sutnje.
Muđuid leat bohtosat ná Deanus: Bargiidbellodat: 39,8 %, 8 áirasa (-1)
Guovddášbellodat: 19,5 %, 4 áirasa (+2)
Deanu sámelistu: 11,5 %, 2 áirasa (+2) Gurut: 9,1 %, 2 áirasa (+1) Ovddadusbellodat: 7,5 % 1 áirras, (-1)
Olgeš: 6,6 %, 1 áirras Sosialisttalaš Gurutbellodat: 6,0 %, 1 áirras
Oktiibuot: 19 áirasa
Maŋŋebárgga diibmu 17.00 bohte loahpalaš válgabohtosat ja dalle lea áibbas čielggas guhte bellodat/ listu lea válgavuoiti Deanus.
Dát logut eai lean vuos almmuhuvvon go áviisa sáddejuvvi prentemii.