– Orru šaddamin rukses-ruoná stivrejupmi
Porsáŋggus lea Bargiidbellodat stuorámus go oaččui 26.2 proseantta jienain. Ja jus oažžu Guovddášbellodaga ja Sosialisttalaš Gurutbellodaga ovttasbargoguoibmin, de lea sis čielga eanetlohku gielddastivrras.
Porsáŋggus oaččui Bargiidbellodat 26,2 proseantta jienain jienasteddjiin ja orrot oažžumin vihtta áirasa gielddastivrii.
– Orru leamen ahte mii sáhttit oažžut rukses-ruoná eanetlogu go Guovddášbellodat oažžu golbma áirasa ja Sosialisttalaš Gurutbellodat fas guokte áirasa. In jáhke ahte šaddá nu stuorra erohus go buot leat gárvásit lohkon. Mii leat hui ilus go mii ain leat stuorámus bellodat Porsáŋggus. Dál fertet gulaskuddat duon guovtti eará bellodagain mo sáhtášeimmet oažžut buoremus politihka Porsáŋggu álbmogii ovddos guvlui, lohká Porsáŋggu sátnejođiheaddji Aina Borch.
Jienat muđui
Olgeš bellodat oaččui 24,3 proseantta ja soaitá oažžut vihtta áirasa gielddastivrii.
Muhto sáhttá viđát áirasa massit doarespolitihkalaš listui mii oaččui 16,9 proseantta dahje Guovddášbellodahkii mii oaččui 16,8 proseantta.
Doarespolitihkalaš listu ja Guovddášbellodat oažžuba guktot golbma áirasa gielddastivrii.
Sosialisttalaš Gurutbellodat oaččui 8,8 proseantta jienain ja oažžu guokte áirasa gielddastivrii ja Ovddádusbellodat oaččui 3,9 proseantta ja gájui iežas ovtta áirasa gielddastivrras.
– Lea váttis einnostit mo sáhttá šaddat. Go buot jienat leat lohkon de sáhttá uhcimus bellodat oažžut dan moadde jiena mat eai leat vel lohkon, lohká Aina Borch.
Áirraslohku nu mo orru dál šaddamin:
Porsáŋggu bohtosat go eanaš jienat ledje lohkkon juohkásedje ná: Bargiidbellodat: 26,2%, 5 áirasa (-1)
Olgešbellodat: 24,3%, 5 áirasa (-2)
Doarespolitihkalaš Listu Porsáŋggus TLP: 16,9%, 3 áirasa (0)
Guovddášbellodat: 16,8%, 3 áirasa (+2)
Sosialisttalaš Gurutbellodat: 8,8%, 2 áirasa (+1)
Ovddádusbellodat: 3,9%, 1 áirras (0)
Ruoksat: 1,8%, 0 áirasa Gurutbellodat: 1,3%, 0 áirasa