Fertejit oidnot johtolagas, bija čuovggaid el-čiekčansihkkelii!
Kjell Magne Grønnli, Kárášjoga lensmánnekántuvrras, ávžžuha váhnemiid čilget mánáide mo vánddardit johtolagas. Jus oidnet mánáid vuoddjimin váraheamet johtolagas, de sii sáhttet váldit vuojána politiija háldui.
Kárášjogas lea lassánan el-čiekčansihkkel geavaheapmi mánáid gaska ja dát lea dagahan digaštallama sosiála mediain. Olbmot ballet ahte čuožžila roavva lihkohisvuohta, go mánát vudjet olles leahtuin geainnuid alde daiguin ja eai geavat šleđggoniid. Ávvir lea maiddái ožžon filmma mas oaidnit ahte mánát vudjet el-čiekčansihkkeliin ja dábálaš sihkkeliin birra johtolatrieggá mii lea Kárášjoga guovddážis.
Váruhus váhnemidda
Kárášjoga lensmánnekántuvrras Kjell Magne Grønnli lohká sii eai leat ožžon makkárge váidagiid ahte mánát vudjet mielaheamet, muhto sii leat oaidnán sosiála mediain ahte olbmot váidalit ja várohit mánáid vuoddjimis. Grønnli lohká sis lea várohus váhnemidda ahte sii fertejit hállat mánáiguin dan birra mo sii galget vánddardit johtolagas ja erenoamážit jus sis lea el-čiekčansihkkel, go dain lea oalle leaktu.
– Go mánát leat jođus el-čiekčansihkkeliin dahje dábálaš sihkkeliin de lea buot deháleamos ahte galget bures oidnot dál seavdnjadis. Galggašii leat čuovga sihke ovddabealde ja maŋábealde, dadjá Kjell Magne Grønnli.
Grønnli muitala mánáin lea lohpi vuoddjit johtolagas nu go dábálaš sihkkeliin. Son deattuha ahte váhnemat fertejit čilget mánáide makkár njuolggadusaid fertejit čuovvut johtolagas ja maiddái bearráigeahččat ahte mánáin lea jealbma.
Biilavuddjiin stuorra ovddasvástádus
Grønnli lohká biilavuddjiin lea hui stuorra ovddasvástádus paragráfa golmmeš mielde, biilavuoddji galgá johttit várrogasat johtolagas ja galgá sáhttit bisánit juohke sivas mii boahtá biilla ovdii.
– Muhto mánát bohtet oalle jođanit ja dalle ii leat daddjon ahte dus lea dat vejolašvuohta, dat váikkuhus dalle lea ahte ráhkaduvvo ášši politijaide ja duogoštuvvu vuoddjinkoarta. Lihkohisvuođat sáhttet fáhkka čuožžilit, vaikke man várrogasat biilavuoddji vánddarda, lohká Grønnli.
Ferte masá bágget
Son deattuha dan stuorra ovddasvástádusa mii váhnemiin lea čilget johtolat njuolggadusaid, go leat oasttán dákkár sihkkeliid mánáide.
– Váhnemat galget ávžžuhit dahje masá bágget mánáid geavahit šleđggoniid ja veasta. Berrešedje maid oastit čuovgga mii lea sihke ovddabealde ja maŋábealde. Váhnemat galggašivčče maid ieža fitnat geahččaleamen makkár dat lea dat el-sihkkel ja el-čiekčansihkkel, vuoi dihtet man jođanit dat duođai mannet go boŋastit olles leavttuin, dadjá son.
Grønnli deattuha sii bohtet bidjat dán váttisvuhtii eambbo návccaid giđabeallai. Son lea gulahalan Johtolatpolitiijain makkár njuolggadusat gusket dákkár sihkkeliidda ja son sáhttá muitalit ahte leat ráhkadeamen ođđa njuolggadusaid našunála dásis ja dat eai čielgga ovdal giđabeallai.
Váldit háldui
– Mii sáhttit váldit min háldui sihkkeliid, jus mii oaidnit ahte mánát vudjet váraheamet johtolagas. De eai oaččo sihkkeliid ruovttoluotta ovdal muohta boahtá, go dalle eai šat geavat daid ovdal giđabeallai, loahpaha Kjell Magne Grønnli.