Gearggus jođihit Gáivuona
Bargiidbellodat lea Gáivuona suohkanválggaid vuoiti ja sátnejođiheaddjievttohas Bernt Eirik Isaksen Lyngstad lea gearggus jođihišgoahtit suohkana. Sii leat jo ságastallagoahtán vejolaš ovttasbargoguimmiin.
Vaikke Bargiidbellodat njiedjá obbalaččat gielddaválggaid oktavuođas, de birgehallet bures máŋgga sámi gielddas. Gáivuonas lea bellodat válgavuoiti.
– Dieđusge lei máilmmi somá ja buorre go birgehalaimet ná bures. Mii leat garrasit bargan válggagiččus ja leat galledan buot viesuid olles Gáivuonas. Miellaláhki gal diehttelasat badjánii go vuittiimet válggaid, dadjá Bargiidbellodaga sátnejođiheaddjievttohas Bernt Eirik Isaksen Lyngstad.
Háliida sátnejođiheaddjin
Maŋŋel go 84 proseantta jienain leat lohkkojuvvon, de čájehuvvo ahte Gáivuona Bargiidbellodat lea ožžon 43,8 proseantta jienain ja ovdána 11,8 proseanttain mannan gielddaválggaid rájes.
– Maŋŋelgaskabeaivvi galget vel 40 jiena lohkkojuvvot, in ge mun jáhke dáid jienaid rievdadit dálá mandáhtajuogu. Mus lea hui buorre dovdu ja lean ovttatláhkai leamaš gearggus čohkkedit sátnejođiheaddji stullui, lohká Lyngstad maŋŋebárgga iđida Ávvirii.
Gaskaboddosaš válgabohtosat čájehit ahte Bargiidbellodat oččošii 8 áirasa suohkanstivrii.
– Mis váilu okta áirras buhtes eanetlohkui, ja danin fertet ságastallet vejolaš ovttasbargoguimmiiguin, čilge son.
Šiehtadallagoahtán ovdal válggaid
Gáivuona Bargiidbellodat lea šiehtadallagoahtán jo vejolaš ovttasbarggu ovdal válggaid.
– Mii leat dássážii gulahallan jo Ruoná birasbellodagain ja joatkit singuin ságastallamiid dán vahkkus. Dasa lassin leat gulahallamin vel ovttain bellodagain, muhto in dáhto vel muitalit makkár bellodagas lea sáhka, lohká Bernt Eirik Isaksen Lyngstad, gii dáidá šaddat Gáivuona ođđa sátnejođiheaddji.
Ruoná birasbellodat massá jienaid Gáivuonas, muhto sii bisuhit iežaset ovtta áirasa suohkanstivrras.
Guovddášbellodat ovdána
Mannan áigodaga lea Guovddášbellodat stivren eanetlogus ovttas golmmain eará bellodagaiguin.
Dálá sátnejođiheaddji Svein O. Leiros ja Guovddášbellodat ovdánit válggain ja bisuhit iežaset áirraslogu suohkanstivrras, muhto Bargiidbellodaga stuora ovdáneami geažil masset fámuset.
Guovddášbellodat doalaha njeallje áirasa suohkanstivrras ja Bargiidbellodat ges lasiha golbma olbmo suohkanstivrii ja oažžu ge 8 áirasa. Risttalaš álbmotbellodagas gártet guokte suohkanstivrraáirasa ja Ovddádusbellodagas, Olgešbellodagas ja Ruoná birasbellodagas gártá guhtiige okta áirras.
Áirraslohku sáhttá rievdat maŋŋel go buot jienat leat lohkkojuvvon.