Vuordán guhká dán beaivvi
Son ii leat gullon golmma jahkkái, muhto dál lea almmuheame iežas vuosttaš skearru.
Ráissaartistta ÁGY ii leat gullon golmma jahkkái. Son lea bargan musihkain ja ohcan erenoamáš šuoŋa.
Dan son lea gávdnan dál, ja lea lonuhan elektropopa pop/rockain.
–Mun lean geahččalan čállit vaikke man olu, muhto mus váillui inspirášuvdna ja mokta. De fárrejin Ráisii fas, gos čálistin lávlagiid skerrui čalbmeravkaleamis, muitala Agnete Båtnes Braaten gean artisttanammá lea ÁGY.
Ođđa šuokŋa
Son illuda go viimmat beassá almmuhit skearru maŋŋel go lea jávkan nu guhká. ÁGY muitala ahte son lea bargan iešguđet buvttadeddjiiguin ja geahččalan gávdnat rievttes buvttadeaddji ja šuoŋa sutnje.
–Ii orron mihkke dego heiveme munnje, muhto de gávnnadin Rolf Morten Amundseniin, ja de orron dego gávdnamin iežan. Máŋggas leat lohkan ahte ođđa šuokŋa heive munnje, dadjá ÁGY. Vaikko lea duhtavaš ođđa šuoŋain, de ii loga gal lohpidit ahte son doalaha das.
–Oassin musihkas han lea geahččaladdat ja ođasmahttit, nu ahte mun soaitán geahččalit fas eará šuoŋaid boahtteáiggis, muhto juste dál gal lean hui duhtavaš.
Ollu vuordámušat
–Mun nu illudan bearjadahkii. Illá nagodan vuordit. Dat šaddá nu somá ja mun sávan ahte beasan čuojahit nu ollu konsearttaid go vejolaš. Sávan maid ahte beasan vuolgit almmuhan gierdomátkái. Mus lea dál stuorát live-páhkka ja eambbo čuojaheaddjit joavkkus, muitala son iluin.
Su ođđa skearru almmuhuvvo čakčamánu 13. beaivve, ja ÁGY ieš govvida dan dego vuosttálasvuođaid birra.
–Dat lea doarrun buori ja bahá gaská, ráhkisvuođa ja eallin mohkiid birra, muitala ÁGY, gii ii riekta sáhte čilget gos son oažžu inspirášuvnna.
–Dat boahtá fáhkka. Olmmoš han čoaggá vásáhusaid, maid guoddá olles eallima, čilge son.