Rievssatbeatnagiid berre gieldit
Finnmárkkuopmodat (Fefo) ii leat bidjan makkár ge doaimmaid johtui várálaš beanadávdda dihte, vaikke árvvoštallet olggobealde Finnmárkku boahtit lagabui 1000 loddebeatnaga go rievssatbivdu álgá. Norggas leat ge dán rádjai jápmán sullii 20 beatnaga imaš dávdda geažil. Eanaš dain leat jápmán Lulli-norggas. Mánnodaga dieđihuvvui ahte Nordlánddas maid ballet beatnaga buohccán dainna dávddain. Dál lea ge álgán rievssatbivdu Finnmárkkus, muhto Fefo ii leat mearridan makkár ge ráddjemiid eastadan dihte beanadávdda leavvamis.
Dat lea oalle issoras oaidnit mot Fefo bealis leat árvvoštallan dan, go eai ovdagihtii ráhkkan eastadit dávdda. Dál eai vuos dieđe okta ge sihkkarit mii dat lea dávddaid ja lea go njoammudávda. Liikká lea Biebmobearráigeahčču rávven olbmuid doallat iežaset beatnagiid eret eará beatnagiiguin. Dat dieđus muitala dan ahte sáhttá leat njoammudávda mii leavvá Norggas. Lea hui ártet go eiseválddit, namalassii Biebmobearráigeahčču, ii leat gieldán geavaheames beatnagiid bivddus mat bohtet olggobealde Finnmárkku.
Lea hui ártet go eiseválddit, namalassii Biebmobearráigeahčču, ii leat gieldán geavaheames beatnagiid bivddus mat bohtet olggobealde Finnmárkku.
Fefo direktevra Jan Olli muitala iežaset vuovdán 1200 bivdokoartta olggobeallai Finnmárkku, ja son árvvoštallá vuollel 1000 beatnaga soitet boahtit bivddu olis. Dat dieđus eai dušše soaitte boahtit, nu go Olli vállje dadjat ievttá Ávviris, muhto dat bohtet. Ja soitet vel eambbo boahtit, go diehtit ahte muhtun rievssatbivdiin lávejit mielde eambbo go dušše okta beana. Beroškeahttá das galle beatnaga leat mat bohtet ja luitojit Finnmárkku mehciide, de lea potensiála stuoris ahte dávda čuovuhuvvo maiddái Finnmárkui.
Ii sáhte vuordit ahte Fefo vállje gieldit geavaheames rievssatbeatnagiid bivddus, vaikke jáhkkimis livčče sis dat vejolašvuohta. Dás aŋkke lea Biebmobearráigeahču, mii lea eiseváldi mas lea váldi mearridit doaimmaid, ovddasvástádus eastadit beanadávdda leavvamis Finnmárkui. Biebmobearráigeahčču orru oalát vajálduhtten ahte rievssatbeatnagat luitojit luovos duovdagiidda mat leat boazodoalloguovlluin, gos boazobeatnagat leat barggus. Dan perspektiivvas lea álki oaidnit makkár váikkuhusat das sáhttet šaddat jus dat beanadávda álgá njoammut beatnagis beatnagii.
Biebmobearráigeahčču ávžžuha ge beanaeaiggádiid ráddjet oktavuođa beatnagiid gaskkas, ja doalahit beatnagiid báttis nu ahte lea bearráigeahčču beatnagiin. Dat lea áibbas veadjemeahttun Finnmárkkus. Rievssatbivdiin lea beana luovos go bivdet, ja boazosápmelaš maid ii višat báddegeahčen beatnaga. Nu ahte potensiála lea stuoris ahte beanadávda njoammu beatnagis beatnagii jus dat lea njoammudávda, ja jus dat čuovuhuvvo Finnmárkui.