Háikejit guhkes gaskka
Dán joavkkus lea veaháš earenoamáš skuvlaárgabeaivi. Sii galget beassat Skániin Kárášjohkii ja Guovdageidnui ja ruovttoluotta moatti beaivvis háikema bokte.
Joavku vázzá Davvi-norgga álbmotallaskuvlla Backpacking Surprise suorggis.
Hirpmástahtti iđit
– Vuossárgga iđđes guđaáigge bohte oahpaheaddjit ja derpe ja čoalkkuhe min uvssaide ja adde šleđggonveastta ja gihppaga ja dadje ahte ii leat veara šat nohkkat, go galgat mátkái, muitala oahppi Emma Nordby.
Emma Nordby muitala ahte leat golbma iešguđetge joavkku mat leat sáddejuvvon iešguđetge guovlluide ja sis lea gilvu.
– Nubbi joavku galgá Hámmárfestii ja Davvinjárgii ja nubbi galgá máttás. In justa muitte dál nama gosa galge. Mis lea čuokkisvuogádat ja gilvalat eará joavkkuin. Juohke háve go joavku ii oađe ovttas ja jos boahtit menddo árrat dahje menddo maŋŋit, de fidnet 100 minusčuoggá. Dál leat mii geahččaleame fidnet háikka gaskal Romssa ja Álttá, muitala son.
Hástalus
– Mii galgat eallit unnit go logi ruvnnuin beaivái juohkehaš, nu ahte lea dehálaš oassálastit báikkálaččat ja geahččalit oažžut oktavuođa olbmuiguin. Váruhit ahte mis leat oktavuođat olbmuiguin ja ahte mii leat siivot, dadjá Emma Nordby.
Son muitala ahte sii juogadit dieđuid iežaset birra iešguđetge Facebook-joavkkuin ja ahte sis lea maid Instagram-kontu gos sáhttá čuovvut sin mátkki. Konttu namma lea machafuko_.
– Mii leat maid geahččalan fidnet beassat báikkálaš aviissaide. Mis han ii leat ruhta masage nu ahte dárbbašat veahki earret eará borramušain, ruđani ja oađđensajiin. Mannan ija ođiimet kapeallas. Sivva manin mii oaččuimet dan lea ovtta olbmo dihtii joavkkus geas lea viellja Suodjalusas, nu ahte gánnáha dovdat olbmuid ja leat rabas, muitala Nordby.
Birgen bures
– Dán rádjai lea mannan hui bures. Leat sakka hirpmástuvvan man veahkkát olbmot leat. Ikte oaččuimet masá menddo olu borramuša. Oaččuimet seahka dievva nisoláibbiid ja diekkáriid Circle K:s Beardogoržžis, ja okta gii válddii moaddása mielde biilii ja dáhtui viežžat pizzaid su namas Pizzabakerenas, muitala Nordby.
Son dadjá ahte dás maid ohppet kultuvrra birra. Oahppit leat bargamin dán ON bissovašvuohtaulbmiliin ja vai hástalit iežaset.
– Prošeakta lea ahte mii galgat oahppat Davvi-norgga kultuvrra birra. Álbmotallaskuvla bidjá maid olu deattu ahte galgat oahppat sámi kultuvrra. Olusat mis leat Østlánddas eret nu ahte lea olu mii lea earálágan.
Ráhkkaneame eaktodáhtolažžan bargat
– Jáhkán ahte sáhttá oahppat olu dan birra ahte olbmot eai leat nu giddanan go jáhkká. Lea maid hárjehaddan alcces, bággehallat leat roahkkadin, dadjá Nordby.
Son dadjá ahte olbmot leat miehtásat, juoga mii lea somá.
– Galgat eaktodáhtolaččat bargat guovtti mánnosaš mátkkis. Galgat Palestinai, eat leat ožžon nu olu dieđuid, muhto jáhkán ahte mii oahppat hui olu, dadjá Nordby.