Skábmagovat-bálkkašupmi Elle-máijá Tailfeathersii
Skábmagovaid bálkkašupmi geigejuvvui Elle-máijá Tailfeathers lávvardateahkeda, ođđajagemánu 25. beaivvi 2020, muohttagis huksejuvvon Guovssahasteáhteris Anára márkanis, dieđiha Skábmagovat preassadieđáhusas. Dán jagi lea 22. háve go Skábmagovat eamiálbmogiid ealligovvafestivála lágiduvvo.
– Mii hálidit dáinna bálkkašumiin čujuhit mo mii atnit árvvus su barggu, erenoamážit sápmelaš ealligovvaservošii. Tailfeathersa karriera čalmmustahttá mo bargu eamiálbmogiid filmmaid ovdii lea máilmmiviidosaš, iige čadnon dušše ovtta báikái. Son movttiidahttá máŋggaid earáid ja ovdamearkkainis čujuhusa, mo fiidnát ealligovain sáhttá gullot maid sosiálalaš oamedovddu jietna, lohká festivála dáiddalaš jođiheaddji Jorma Lehtola preassadieđáhusas.
Muohtateáhter lei spágga dievva go filbma «The Body Remembers When The World Broke Open» čájehuvvui.
Guhkesfilbma
Elle-máijá Tailfeathersa vuosttaš guhkes ealligovva, ovttasráđiid Kathleen Hepburniin bagadallon «The Body Remembers When The World Broke Open» lea jo geargan vuoitit máŋggaid bálkkašumiid ja leamaš kritihkkariid válljejupmi diimmá buoremus Kanáda ealligovva. Ealligovva, man vuosttašeahket lei Berlinales 2019:s, govvida guovtti nissona soaittáhaga deaivvadeami, go nubbi lea báhtareamen bearašveahkaválddis.
Oahppu ja hárjehallan
Elle-máijá Tailfeathers gearggai Vancouvera ealligovvaskuvllas 2006:s ja son lea dan rájes dahkan máŋggaid oanehisfilmmaid, maid vuolggasadjin lea leamašan aktivisma, sosiálalaš vuoiggalašvuohta ja eamiálbmogiid čuolmmat. Su árat buvttadussii gullet earret eará «Bloodland» (2011), «A Red Girl’s Reasoning» (2012), mii kommentere eamiálbmotnissoniid goddimiid ja jávkamiid, «Bihttoš - Rebel» (2014), man fáddá lea Tailfeathersa sámi duogáš.
Filbmabagadalli Elle-máijá Tailfeathers oaččui jagi 2020 Skábmagovat-bálkkašumi barggus eamiálbmogiid ealligova ovddas.
Su duogáš
Elle-máijá Tailfeathers máttut gullet sihke Niitsitapi nammasaš eamiálbmotčerdii Davvi-amerihkás ja sápmelaččaide. Niitsitapi lea eŋgelasgillii Blackfoot jorgaluvvon čáhppesjuolgin. Elle-máijá Tailfeathers lea čáhppesjuolgi-sápmelaš filbmadahkki, buvttadeaddji, neavttár ja aktivista. Kanádas bajásšaddan Tailfeathersis lea nana čanastat áhčis ruovttuguovlluide dážabeale Sámis gos son lea doaibman earret eará Beaivváš Sámi Našunálateáhtera neavttárin.