Frank Juhls lea vádjolan
Frank Juhls šattai 88 jagi boarisin. Soai eamidiin álggaheigga Finnmárkku vuosttaš silbarávddi Guovdageidnui, Juhls Silver Gallery.
NRK Troms og Finnmark čállá sin neahttasiiddus ahte Sunniva Juhls lea muitalan sidjiide ahte su áhčči Frank Juhls lea vádjolan.
Frank Juhls lei Dánmárkkus eret. Son bođii Guovdageidnui 50-logus. Guovdageainnus son gávnnai iežas stuora ráhkisvuođa, Regine Juhls. Soai náitaleigga ja oaččuiga guokte nieidda.
Sápmelaččaid verdde
Frank Juhls lei barggánis olmmái. Son lei reaŋgan sápmelaččaide ja veahkahalai sin feara mainna. Sápmelaččat jearahalle dávjá Frank
Juhls’a divvut sin silbbaid, ja nu de fuomášeigga eamidiin ahte dat lea juoga mainna sáhttiba eallit. Eamidiin soai fárriiga Københámmanii ovtta dálvái ja válddiiga silbarávddi oahpu.
Go giđđa bođii, de soai bođiiga fas Guovdageidnui, ja nu de álggi Juhls silbarávddi historjá. Geasset jagi 1959:s huksiiga vistti Guovdageidnui eatnogáddái. Visti šattai sudno orrunbaikin, ja maiddái sudno bargobáikin.
Dovddus silbarávdi
Fiinna silbbaid ráhkadeigga ja divuiga sápmelaččaide, ja nu soai šattaige dovddus silbačeahpit. Juhls Silver Gallery lea beaggán miehta máilmmi. Olu turisttat fitnet sin luhtte.
Guovdageainnus lea sudno nuoramus nieiddas Sunniva Juhlsas dál váldoovddasvástádus. Son lea maid čađahan silbarávdeoahpu. Juhlsas lea maid silbarávdi Bergenis, doppe lea sudno nubbi nieida Rauna Juhls beaivválaš jođiheaddjin.
Čalmmustahttán Guovdageainnu
– Mun muittán Frank Juhlsa hui bures dalle go vuohččan bođii Guovdageidnui. Sus lei mohtorsihkkel mainna lávii vánddardit ja son huksii unna skajaža min viesu olggobeallái. Son lávii fitnat juohke beaivvi min viesus viežžame mielkki. Sus lei unna barttaš nuppe bealde eanu, dies gos Juhlsa silbarávdi lea dal. Sus lei fanas mainna sugai eanu rastá min viesus iežas bartii. Mis lei hui buorre oktavuohta álggu rájes juo, muitala Guovdageainnu sátnejođiheaddji Hans Isak Olsen.
Olsen lohka muitit Frank Juhlsa jaskes ja siivo olmmožin.
– Frank Juhls eamidiin leaba čalmmustahttán Guovdageainnu máŋgga ládje, ja Juhls Silver Gallery lea hui mávssolaš midjiide. Juhls lea maid dakkár baiki gos mii lávet ávžžuhit olbmuid fitnat go bohtet Guovdageidnui, loahpaha sátnejođiheaddji Hans Isak Olsen.