– Vuosttaš háve gildojuvvo muhtun bargat bohccuiguin
Álttá diggegoddi lea cealkán duomu, ahte dievdu gii lea ovdal dubmehallan biinnidan bohccuid, ii beasa bargagoahtit fas bohccuiguin.
Ráđđehusadvokáhtta Henrik Vaaler lei duđavaš go Álttá diggegoddi lea dohkkehan stáhta ákkastallama dán áššis.
– Diggegoddi lea ovttaoaivilis buvttadangildosa vuođuin , lea sáhka roavva rihkkumiin elliidčálgolagas ja dikkis maid ii leat luohttámuš dasa ahte almmái áimmahuššá bohccuidis boahtte áiggis. Mii leat duđavaččat duomuin, lohká Henrik Vaaler Ávvirii.
Loktii mearrádusa diggái
Biebmobearráigeahčču dat mearridii mannan čavčča gieldit guokte dievddu eaiggáduššamis, doallamis, bearráigeahččamis dahje earaládje váldimis ovddasvástádusa bohccuide ja eará buvttadanelliide. Dasa ii mieđihan nubbi dievdu, ja mearridii geahččalit ja dárkkistit Biebmobearráigeahču mearrádusa dikkis.
– Leat roavva elliidčálgolága rihkkumat
Álttá diggegoddi lea cealkán duomu áššis, ahte son ii beasa vel bohccuiguin barggat. Eanandoallo- ja biepmodepartemeanta áššehuvvá. Dievdu lea maid dubmejuvvon máksit stáhta áššegoluid, 87 482 ruvnno.
– Leat roavva elliidčálgolága rihkkumat mat leat vuođđun. Dikki áddejupmi lea ahte lea vuođđu váruhussii ahte ášševuojeheaddji sáhttá ođđasit dagahit iežas sivalažžan rihkkumis elliidčálgolága, jus boahtteáiggis čuožžila vejolašvuohta ekonomalaččat vuoitit jus gieđahallat elliid hejot. Diggi árvvoštallá ahte son ii leat dohkálaš bargat boazobargguid. Diggi lea gávnnahan ahte doaibmagielddus lea dárbbašlaš, čállá diggi duomus.
Vuosttaš duopmu
Ráđđehusadvokáhtta Henrik Vaaler lohká dán vuosttaš ášši gos lea addon gielddus bargamis bohccuiguin.
– Dás lea sáhka buvttadangildosis mii lea dieđusge ovdal addon eará áššiid oktavuođas, muhto dalle leamašan sáhka sávzzas dahje eará buvttadaneallis, dadjá Henrik Vaaler.
SP 27 ii hehttehussan
Son čilge ášši leamašan earenoamáš go lea leamašan gažaldahkan rihkku go mearrádus SP 27. artihkkala
– Diggi lea gávnnahan ahte SP 27. artihkal ii leat hehttehussan gieldinmearrádussii. Dikkis lea seamma árvvoštallan go mis ja lean duhtavaš, lohká ráđđehusadvokáhtta.
Son lohká lágalaččat ii leat erohus lea go boazu dahje gussa go lea sáhka buvttadangildosis.
Eat fidnen ságaide
Dievddu advokáhtta Arnt Angell ii lean fidnemis ságaide. Duopmu ii leat vel fámolaš, go guoddalanáigi lea mánu, čállá Álttá diggegoddi.