Lihkku beivviin mii lei, Sámi mánát ja Sámi sáhpánat!

Ledjet go don makkárge doaluin Sámi álbmotbeaivvi? Mun mannen álbmotviesu lusa geahččat! Njágadin álbmotviesu luhtte geahččamin mii doppe dáhpáhuvvá. Dohko ledje olu olbmot čoagganan, stuorrát ja smávvát. Eatnasat ledje čikŋagasas. Ledjen dán jagi maid jurddašan njáhkat sisa, muhto in ollen dan bále go uksa lei rabas. Šadden olggobealde lásegárpmas čohkkát ja geahččat go siste herskostalle. Suoli gáđaštin sin geat siste suohtastalle. Go ledjen oanehaš čohkkádan das, de jurdilin maid bat mun olbmuid gáđaštan? Mun han sáhtán ieš lágidit doaluid ovttas eará sáhpánčivggaiguin. Ruhtten doama doama ruoktot eadnái muitalit maid dál áiggun. Eatni mielas lei mus buorre jurdda ja ordestii munnje veaháš niesti sehkkii. Ruhtten biejus bidjui ja bovdejin sáhpánčivggaid boahtit doaluide min bieju olggobeallái. Juohkehačča sihten váldit mielde veaháš borramuša. Fargga čoagganeimmet min bieju olggobeallai. Buot sáhpánčivggat geat orrot lahkosis bohte. Snorri eadni lei aitto gáhkken ja lei sádden Snorri mielde njálgga gáhkuid. Biippa áhčči ges lei sádden njálgga sáfta. Herskostalaimet, stoagaimet ja lávlluimet. Livččii oba somá gullat maid DON barget Sámi álbmotbeaivvi.

Itgo gillešii čálistit munnje reivve gos muitalat maid barget? Sáhtát maid tevdnestit gova munnje mas čajehat maid barget Sámi álbmotbeaivvi!