– Mii leat buohkat morrašis
Sihke orohatovdaolmmoš ja sátnejođiheaddji dadjaba stuora morraša boazodoalus maŋŋel go Ávanuori suohkanis lei lihkohisvuohta mas 44-jahkásaš Anders Mathis Johannes Persen Utsi duššai.
Disdaga dieđihit politiijat ahte lei 44-jahkásaš Anders Mathis Johannes Persen Utsi gii duššai lihkohisvuođas Muorralis mánnodat iđida. Oapmahaččat leat ožžon dieđu ja leat suovvan politiijaid almmuhit nama.
– Duššan olmmoš gávdnui ceakko ráma vuolde ja ii leat man ge geažil dárbu jurddahit ahte lei eará go surgatlaš lihkohisvuohta. Rumaš ii galgga obdukšuvdnii, muitala politiijaadvokáhtta Marit Valan preassadieđáhusas.
Almmái gávdnui muhtin alla ja ceakko ráma vuolde ja sii geat gávdne albmá árvvoštalle ahte son lea fierran dahje gahččan birrasiid 150 mehtera.
– Báiki gos almmái gávdnui lea muhtin njárggas gaskkal siskkit ja olggut Pollena, muitalii Stein Kristian Hansen politiijaid operašuvdnaguovddážis Ávvirii.
Lagamusat jurdagiin
Orohat 16 Kárášjoga oarjjabealli, gosa Anders Mathis Johannes Persen Utsi gulai, ovdaolmmoš John Anders Sara dadjá ahte lea stuora moraš olles boazodoalus dál maŋŋel go ožžo dieđu lihkohisvuođa birra.
– Mii leat buohkat morrašis dál. Son han lei nuorra olmmoš gii aitto lei ceggemen bearraša. Mii buohkat jurddašit su buot lagamusaid birra, dadjá Sara.
– Dat ii leat mihkke suohttasiid go diekkár dáhpáhusat dáhpáhuvvet, joatká son.
Sihkarvuohta jurdagiin
Sihke Muosát suohkanis, gos lihkohisvuohta dáhpáhuvai, ja maid eará mearragáddeguovlluin lea heajos siivu, jikŋon eatnamat ja heajos guohtumat. Dat dagahit maid várálaš dili boazobargiide.
Sara dadjá lihkohisvuođa muittuhit sihkarvuođa go olmmoš lea vánddardeamen olgun.
– Olmmoš geahččala váruhit vaikko muhtomin šaddá mannat dakkár báikkiide gos sáhttá leat váralaš. Jus čalgá vaza čađa, de lea jiekŋa. Ja mis leat gállja dat várit dál, dadjá Sara ja muitala sin johtimin maŋemus oasi dál ovdal go ollejit geasseorohahkii.
– Vaikko mii leat vánddardan ollu mehciin ja hárjánan, de sáhttá leat sorbmi doppe maid olmmoš ii fuobmá, nu ahte dál ferte leat várrogas, joatká son ja ávžžuha buohkaid geat vánddardit meahcis leat várrogasat.
Olles gielda morrašis
Kárášjoga sátnejođiheaddji Svein Atle Somby dadjá dán dáhpáhusa surgadin ja váivin.
– Unna servodagažis, nu go Kárášjohka lea, de čuohcá dát dáhpáhus buohkaide ja mun smiehtan lagamusaid birra ja válddán oasi sin morrašis, dadjá sátnejođiheaddji.
– Mun dieđán ahte sus báhce sihke smávva mánát ja ovttasássi, ja mu jurdagat leat sin luhtte dál, joatká son.
Boazodoallu váttis dilis
Go dákkár dáhpáhus dáhpáhuvvá de čuohcá dat olles servodahkii ja maid boazodollui. Sátnejođiheaddji ávžžuha buohkaid váldit vára guđet guoibmásis dán lossa áiggis.
– Dan dilis mas mii leat dál ja boazodoalus lea guohtunroassu, de ii lean gal dárbbašit dákkár lossa dáhpáhus vel boahtit dán dili ala, dadjá Somby.