Ergoniid siidda boazodoallit bivdet veahki
245,44 km2 sturrosaš guovllus áigu ruvkefitnodat Akkerman Finland Oy ohcagoahtit minerálaid. Guovlu lea Darvvatvári meahcceguovllus Eanodaga gielddas. Guovllus lea luondu suodjaluvvon ja lea oassin Giehtaruohttasa bálgosis gos viđa siidda bohccot guhtot.
Akkerman Finland Oy duođašta ahte sin fitnodat ohcagoahtá minerálaid dan guovllus Eanodaga gielddas. Guovtti jagi sisa sii sáhttet maid ohcat rogganlobi guovllus. Dán rádjái eai leat gal vuos gávdnan minerálaid maid lea ekonomalaččat gánnáhahtti roggagoahtit guovllus. Sii lohket ohcama buktit fysalaččat hui unnán váikkuhusaid birrasii, ja muhtun iskosat dahkkojuvvojit maid áimmus go geavahit geologalaš rusttegiid. Fitnodat lohká sin áigut atnit árvvus sámi kultuvrra, boazodoalu ja giela. Sii áigot čuovvot buot lágaid ja njuolggadusaid várjalan dihte dan ja maiddái luonddu suodjalanguovllus.
Dan guovllu boazodoallit ballet dieđusge hirbmadit dain plánain. Sidjiide lea dat áittan. Ergon Duommá Ánne Minna Biret Ellen, gii gullá Ergoniid siidii, atná juo garrasit sániid ja dadjá dát gottášii sin ceaggut dohko jus dat ruvkeplána ollašuvvá. Sin siiddas ii leat šat eallinvejolašvuohta. Iige sin boahttevaš sohkabuolvvas, čilge son. Dál leat sii váidán ášši Davvi-suoma hálddahusriektái.
Plánat buktet čielgasit stuora váikkuhusaid olles guvlui, vaikko guovlu lea suodjaluvvon boazodoalloguovlu ja oassin Giehtaruohttasa meahcceguovllus. Guovlu lea maid suodjaluvvon Natura-2000 guovlun ja maiddái jekkiid suodjalanguovlu.
Ruvke ja boazodoallu eai heive oktii. Eat jáhke ahte dat guokte ealáhusa sáhttet bálddalaga birget. Lea áibbas čielggas goabbá šaddá vuolgit eret jus ruvkedoaimmat bohtet guohtuneatnamiidda. Boazu gal garvá dakkár báikkiid gos stuora mašiinnaiguin rogget. Dađi bahábut de ii dáidde dán siidda ballu leat dušši, nu go dávjá gullat sin čuoččuheame geat dorjot ruvkkiid.
Ergoniid siida bivdá fuomášumi ja veahki, eai ge sii áiggo vuollánit cakkadeames ruvkeplánaid, vaikko dovdet sii leat dál juo oba geahnoheamit stuora ruhtafámuid ja eiseválddiid vuostá. Ruvke ii čuoza dušše sin boazodollui, muhto das šaddet váikkuhusat Davvi-guovlluide sihke Suoma, Norgga ja Ruoŧa bealde. Go luondu nuoskkiduvvo, de billahuvvet čázádagat. Sámi servvodat galggašii gávdnat návccaid doarjut boazodoalu dán áššis, vaikko industriijadárbbut leat áittan luondduealáhusaide oažžu dadjat juo buot guovlluin Sámis.
Sámi servvodat galggašii gávdnat návccaid doarjut boazodoalu dán áššis, vaikko industriijadárbbut leat áittan luondduealáhusaide oažžu dadjat juo buot guovlluin Sámis.