Dál ollašuvvá Vuonnabađa ođđa viessoguovlu
Unjárgga gielddas leat ilus go besset viiddidit Vuonnabađa ássanguovllu, ásaheapmi máksá justa vuollel 10 miljovnna ruvnnu ja bargu ráhkkanahttit gieldda ođđa viessosajiid álggahuvvo geassemánu álggus.
Unjárgga gielda fállagoahtá ođđa viessosajiid. Fargga leat ođđa viessosajit vuovdimassii Vuonnabađas, lahka skuvlii, mánáidgárdái ja buvdii. Vuonnabađa ođđa viessosajiid goaivugohtet geassemánu álggus. Lea Álttá fitnodat Tormod Kristensen AS mii lea barggu váldoentreprenevra. Goivojuvvojit 27 ođđa viessosaji mat leat gaskal 1,3 – 1,60 dekára. Viesuid sáhttet huksegoahtit báikái 2021 giđa.
Unjárgga gielda sátnejođiheaddji Knut Store lea ilus go leat viimmat oažžumin sadjái ođđa viessosajiid Vuonnabahtii.
– Lea leamaš áigumuš ásahit ođđa viessosajiid lahka skuvlla ja mánáidgárddi. Olbmot leat ohcalan dan ja lea gelddolaš oaidnit man gallis huksegohtet viesu báikái, ja mii leat juo ožžon sávaldagaid dan oktavuođas. Dan beassat mii oaidnit go viessosajit biddjojit vuovdimassii, dadjá sátnejođiheaddji Knut Store.
Viimmat ollášuvvá
Unjárgga gieldda doaimmaid ja prošeavttaid ossodatjođiheaddji lea Roy Aslaksen, ja son muitala ahte sii leat duhtavaččat sihke hálddahusa ja politihkkáriid bealis ahte ássanguovlu viimmat ollašuvvá.
– Dat lea juoga maid hálddahus ja politihkkárat leat bargan 10-11 jagi ollašuhttit. Dál lea viimmat ruhtadeapmi dasa ja mii lea dahkan šiehtadusa Álttá fitnodagain Tormod Kristensen AS. Mii geavahit justa vuollel 10 miljovnna ruvnnu , mii lea veahá hálbbit go doaivvuimet, ja dan dáfus leat mii hui duhtavaččat, dadjá Aslaksen.
Ođđa viessoguovlu
Son muitala ahte entreprenevrra lea dál mihtideamen allodagaid guovllus, vai lea sihkar ahte geaidnu boahtá gosa gielda lea plánen.
– Dan boares Asvu viesu duogábealde lea rápma gosa huksejuvvojit ođđa viessosajit. Dat šaddá lunddolaš guhkideapmin dálá viessoguovllus mii lea Vuonnabađas. Ođđa viessoguovlu lea ráma mielde gitta bávtti ala. Muhtin viessosajiin lea oainnus vutnii ja muhtin viessosajit eai oaččo dan. Dat maid boahtá das man alladin hukse viesu, dadjá Aslaksen movttegit.
Olu huksemuš Vuonnabađas
Son muitala ahte gielddas eai leat dál nu galle viessosaji gosa sáhttá hukset viesuid, nu ahte lei áigi ahte ásahuvvojit ođđa viessosajit gildii.
– Ođđa viessosajit boahtá oktan dan mii geavvá dál Vuonnabađa guovddážis. Guovtti jagi geahčen huksegoahtá Stáhta geaidnodoaimmahat guovddášsaji lahka kafea, Girkonjárgga guvlui. Veaháš dobbelis seamma sajis leat eará entreprenevrrat gárvemin industriijaviessosajiid gildii ja dat leat várrejuvvon ealáhusaide. Geavvá olu gielddas, ja mii vuoruhit sihke ealáhusaid ja viessosajiid, loahpaha Roy Aslaksen.