– SOMÁ go atnet árvvus mu barggu
Samemišuvdna giittii Anders M. Sokki (80) buori ja oskkáldas barggu ovddas maid son lea norggabealde sámi guovlluin dahkan.
Anders M. Sokki álggii 1993 bargui Fjellheim biibbalskuvlii Romsii, ja barggai dulkan moadde jagi ovdal 1998:s bargagođii sihke dulkan ja sárdnideaddjin Sámemišuvnna ovddas.
Mánnodaga geigii Klemet J.O. Haetta Sámemiššuvnna bealis liđiid Ántii, giitiin dihte buori barggu ovddas.
Háliida ain joatkit
Ánte devddii 80 jagi mannan čavčča, ja maiddái dan oktavuođas háliidii Samemišuvdna gudnejahttit su. Samemišuvdna čállá dearvvuođain sii giitet Ántte dan buori ja oskkáldas barggu ovddas maid son lea dahkan Samemišuvnnas.
– Dat lea dieđusge hui somá go atnet árvvus dan maid mun lean bargan, dadjá Ánte.
Son áigu ain joatkit sárdnideames Samemišuvnna ovddas.
– Mun lean lohkan ahte nu guhká go lean dearvvaš de áiggun joatkit sárdnidit ja dulkot. Mun lean álot háliidan sárdneolmmájin šaddat. Mun háliidan sárdnidit, ja mun háliidan ahte earát maid bohtet searvái.
Viiddis guovlu
Ánte lea ollu mátkkoštan Sámemišuvnna mielde, ja sárdnidan sihke sámegillii ja dárogillii čoakkalmasain. Klemet J.O. Haetta, Samemišuvnnas, lohká dán stuora bargun.
– Dat dovdo dieđusge ahte lea hirbmat stuora ja viiddis guovlu maid galgá gokčat, eai ge leat nu máŋggas geat dál šat johtet birra ja sárdnidit. Moai letne Ánttiin guovttá dáppe, ja mun lean dušše dulka, muitala Klemet.
Čoakkalmasaid oktavuođas bohtet veahkkin eará guovlluin, muhto goappašagat livččiiga sávvan eanet sárdnideddjiid sámi guovlluin.
– Mii háliidit dieđusge Ántte joatkit, ja leat hui giitevaččat dainna, muhto mii oaidnit maid dárbbu eanet sárdnideddjiide, lohká Klemet.
– Láve nu somá go čoakkalmasain leat nuorat mielde. Ii dárbbaš leahkit eará go okta, de orru dego olles nuorra nálli lea doppe. Dat lea gal nu somá, lohká Ánte.