Skeŋkejit ruđa borasdávdasearvái
Sámi joatkkaskuvlla ambulánsa- ja dearvvašvuođafága Kárášjogas lei plánen vuolgit Roavvenjárgii oahppomátkái, muhto korona dihtii ii leat mátki vejolaš.
Sámi joatkkaskuvlla ambulánsaja dearvvašvuođafága Kárášjogas lei vuolgimin miessemánus oahppomátkái hárjehaddat buohcceviesus. Sii ledje earret eará vuovdán loattaid ruhtačoaggimii.
– Plána lei mannat Roavvenjárgii Supmii hárjehaddat buohcceviesus. Doppe galggaimet hárjehaddat veaháš maid ge, nu go ovdamearkka dihtii riegádahttima oktavuođas ja maid bargat iešguđetge dilálašvuođain. Muhto dat šluhttejuvvui dađi bahábut, muitala oahppi Morten Nyberget.
Son muitala ahte sis lea leamašan mátki ságastallanfáddán olles skuvlajagi, muhto eai leat leamašan sihkkarat áigot go buohkat leat mielde. Son dadjá ahte mearridedje ođđajage- dahje guovvamánus ahte vulget.
– Jáhkán olles luohkás šattai váivi go lei dego skuvlajagi somámus dáhpáhus. Leat gullan luohkáin geat leat ovdal leamašan doppe ahte lea hui buorre, ja leat oaidnán govaid, nu ahte lei hui šállošahtti go eat beassan vuolgit, muhto ii dainna sáhte dahkat nu olu, dadjá Nyberget.
Skeŋkejit ruđa borasdávdasearvái
– Mii leat mearridan skeŋket olles loaddasisaboađu mánáidborasdávdasearvái, dadjá Morten Nyberget.
Son dadjá ahte sii barget dan go háliidit addit mánáide, geaidda lea borasdávda čuohcan, buoret árgabeaivvi. Luohkká šattai ovttaoaivilii ja buohkaid mielas lei buorre doaibma, ja oahpaheaddji maid šattai hui movtta, muitala son.
– Lea lossat go dakkár dávda šaddá, ja mii smiehtaimet ahte juohke doarjja veahkeha. Jos addit dan maid leat čoaggán sidjiide, de sáhttá leat álgu buoret árgabeaivái, dadjá Nyberget.
Rámis iežas ohppiiguin
– Ambulánsa- ja dearvvašvuođafága luohkká lea jahkásaččat oahppomátkkis Roavvenjárggas. Lávet mannat dan mátkái juohke jagi ovdal eksámena vai oahppit besset hárjehallat ovdal eksámena, muitala oahpaheaddji Mai Rita Haetta Hansen.
Son dadjá ahte mátki máksá olu, nu ahte oahppit ledje álggahan ruhtačoaggima, muhto korona dihtii eai ožžon vejolašvuođa vuolgit dan mátkái.
Oahpaheaddji dadjá iežas šaddan hui rámis go oahppit leat nu servodatberošteaddjit ahte addet ruđa mánáidborasdávdasearvái ja ahte lea rámálmas válga.
Son lohká dan čájeha ahte sis leat buorit árvvut ja buorre guoddu. Lea movtta go leat válljen dan láhkai bargat, ja jáhkká dan leat ieža maid.
– Rámis go eai dušše geavat ruđaid tuljaide, go dat maid livčči sáhttán geavvat, dadjá Mai Rita.