Dál lea skeaŋka-tv sajis ássanguovddážis
Ávvir skeŋkii 5.000 ruvnno Allaeanan ássanguovddážii ođđajagimánus, dainna ruđain galge oastit ođđa TV. Guovdageainnu eaktodáhttoguovddáš searvvai lassi ruđain vai juo ožžot stuorebuš TV.
Ávvira stivra mearridii juovlamánu 2019:s skeŋket 100 000 ruvnno eaktodáhtolaš bargguide sámi gielddain, ja danin ávžžuhii Ávvir álbmoga evttohit olbmuid, servviid ja ásahusaid mat barget servodahkii ávkin ja geat ánssášivčče ruhtadoarjaga.
Loga ášši: Ođđajagimánus jugii Ávvir 100.000 ruvnno iešguđet doaimmaide Sámis.
Ožžo 5.000 ruvnno
Allaeanan ássanguovddáš oaččui 5.000 ruvnno Ávviris, ja dainna ruđain áigo oastit ođđa TV boarrásiidda geat orrot ássanguovddážis. Evttohusas čuoččui ahte háliidivčče ahte buohkain galggašii vejolašvuohta čoahkkanit stohpui, ja geahččat TV ovttas bargiiguin ja eará ássiiguin.
Lasihedje ruđa
Guovdageainnu eaktodáhttoguovddáža beaivválaš jođiheaddji Risten Elle Siri muitala ahte son oaččui cavgileami muhtin oapmahaččas ahte ássanguovddážis ii doaimma TV.
– Mun válden oktavuođa eaktodáhttoguovddáža stivrrain, ja mii mearrideimmet bidjat dan ruđa mii váillui vai beassat oastit albma stuora TV ássanguovddážii, dadjá Siri.
TV man dál oste, das lea árvu 13.000 ruvnno.
– Máilmmi buorre skeaŋkka
Guovdageainnu sátnejođiheaddji Hans Isak Olsena mielas lea TV máilmmi buorre skeaŋka.
– Mun lean gullan ahte ássanguovddážis ii doaimma TV, ja de lea easka máilmmi buorre go sii ožžot TV skeaŋkkas Ávviris ja eaktodáhttoguovddážis, dadjá sátnejođiheaddji.
Sátnejođiheaddji doaivu ahte
TV boahtá adnot olu, go dál besset ássit ja bargit čohkkát ovttas ja geahčadit ođđasiid ja filmmaid.
– Risten Elle ja eaktodáhttoguovddáš barget buori barggu, ja juste dasa lea dát buorre ovdamearka, go skeŋkejit TV ássanguovddážii, dadjá sátnejođiheaddji ja lasiha:
– Mu mielas lea hui buorre go min suohkanis leat dakkár doaimmat, dat lea eaktodáhtolaš bargu ja das lea stuora ávki buohkaide.
Giitevaš
Ássanguovddáža jođiheaddji Johan Turi lea giitevaš ođđa TV ovddas.
– Lei hirbmat buorre go muhtin min bargiin fuobmái saddet Ávvirii ruhtaohcamuša. Dal besset ássit geahččat boares filmmaid, ja ovdalaččas lea čajehuvvon ahte go besset dološ filmmaid geahččat de čuvvot hui áŋgirit mielde.
Okta sávaldat vel
Ássanguovddáža bargi Britt Inger Bals muitala ahte sis livčče okta sávaldat vel ovdal geasi.
– Beavdi ja stuolut mat mis leat olgun dal, dat eai leat beare buori stánddas, ja min sávaldat lea oažžut ođđa beavddi ja stuoluid maid sahttit olggos bidjat dal go geassi lahkona, muitala Bals.
Bals lohká maid ahte jus muhtimis lea beavdi ja stuolut maid sin ássit sahttet geavahit, de sii váldet áinnas daid vuostá.