– STÁHTAS LEA LOHPI ADDIT eará joavkkuide lobi guolástit
Deanučázádaga guolástanhálddahusa (DG) stivrra nubbijođiheaddji, Benn Larsen, lohká ahte vaikko Dálkkádat- ja birasdepartemeantta stáhtačálli Maren Hersleth Holsen logaš ahte stáhtas lea váldi addit guolástanlobi earáide, de ii rievdat DG oaivila ahte stáhta rihkku Deanulága nu mo advokáhttafitnodaga Haavind juridihkalaš árvvoštallan duođašta.
Ávvir bivddii árat dán vahkkus Dálkkádat -ja birasdepartemeantta jienádit advokáhttafitnodaga Haavinda juridihkalaš árvvoštallamii, leat go Norgga eiseválddit rihkkon Deanulága §§4-6 go vuolláičálle 2016:s ođđa Deanusoahpamuša. Dalle dohkkehedje Norgga eiseválddit ásahit ođđa vuoigatvuođalaččajoavkku, Suoma beale bartaeaiggádiid, Deanučázádaga rádjaguovllus, vaikko Deanuláhka ráddje vuoigatvuođalaččaid logu.
– Stáhtas lea lohpi addit eará joavkkuide lobi guolástit (Deanu) čázádagas, vástida Dálkkádat -ja birasdepartemeantta stáhtačálli Maren Hersleth Holsen departemeantta ovddas. Olles vástádus, geahča vulobealde.
– Olles Deanusoahpamuš lea politihkalaččat mearriduvvon bákkuin, muhto dat ii rievdat min oaivila ahte dás rihkkojuvvo Deanuláhka. Dan maid advokáhttafitnodat Haavind dás lea juridihkalaččat árvvoštallan, lea maid guovddáš oassi das manin Deanučázádaga luossabreavaeaiggádat leat stevdnen stáhta diggái, lohká Benn Larsen.
Son lea sihke Deanučázádaga guolástanhálddahusa stivrra nubbijođiheaddji ja maiddái Deanučázádaga Luossabreavaeaiggádiid searvvi čálli. Go gullá departemeantta vástádusa, de jearrala vuos gii dan lea vástidan.
– Mii leat dan rájes go ođđa Deanučázádaga guolástanhálddahus válljejuvvui 2015:s ja go bargagođiimet áššiin, de leat mii fuomášan ahte departemeanttas lea okta nubbi jurista geassádan dán áššis, čilgesta Larsen.
– Politihkalaš bákkuin mearriduvvon
Larsen deattuha ahte dat ođđa vuoigatvuođalašjoavku man leat ásahan Suoma beallái 2016 Deanusoahpamuša bokte,das ii leat seammalágan joavku dáža bealde.
– Mii oaivvildat maid ahte guovddáš njuolggadus árabut lei ahte eanaoamasteapmi ii atte automáhtalaččat guolástanvuoigatvuođa Suoma bealde. Leamaš maid gáibádus das ahte galgá leat fásta ássi gielddas. Mii oaivvildat ahte Suoma eiseválddit leat spiehkastan dan prinsihpas eret, mas lea leamaš ovttaoaivilvuohta ovdal. Dát bartaeaiggádat leat leamaš turisttat go leat bivdán Deanučázádagas, lohká Benn Larsen.
Son čilge ahte Deanučázádaga Guolástanhálddahusas ja Deanučázádaga Luossabreavaeaiggádiin lea seamma oaivil dán áššis. Deattuha ahte sii eai sáhte dohkkehit ahte Suoma beale bartaeaiggádat besset Norgga beale nuvttá bivdit.
Oaivvilda ahte Norggas lea lohpi addit lobi vaikko geasa
– Mii dovdat advokáhttafitnodaga Haavind árvvoštallama mii čuoččuha ahte 2016 Deanusoahpamuša vuolláičálliin Suomain rihkku Deanulága guovddáš njuolggadusaid. Mii eat leat ovttaoaivilis dainna árvvoštallamiin. Ii leat eahpádus ahte báikeolbmuin Deanučázádagas leat erenoamáš guolástanvuoigatvuođat, muhto seammás lea stáhtas lohpi addit eará joavkkuide lobi guolástit čázádagas, earret eará dat joavkkut mat namuhuvvojit Deanusoahpamušas.
Deanučázádaga gažaldagat vuoigatvuođaid ja noađđejuogu birra leat oassin dain váttisvuođačuolmmain maid Nuorta-finnmárkku diggegoddi galgá mearridit maŋŋelaš dán jagis, čállá Dálkkádat- ja birasdepartemeantta stáhtačálli Maren Hersleth Holsen vástádusas.
Stevdnen stáhta diggái
Nuorta-finnmárkku diggegoddi dieđiha ahte lea Deanučázádaga luossabreavaeaiggádiid searvi ja Deanučázádaga stággobivdosearvi mat leat stevdnen stáhta Dálkkádatja birasdepartemeantta bokte. Ášši meannuduvvo dikkis olles 37. vahkus dahje čakčamánu 7. beaivvis gitta 11. beaivái 2020:s.