Dárbu jođánit rievdadit hálddašeami
Mannan vahkku sáddii Geir Adelsen (Guovddášbellodat) čálalaš gažaldaga Norgga dálkkádat- ja birasministarii Sveinung Rotevatnii boazodoalu boraspireváttisvuođaid birra.
Adelsten ja su bellodatustibat čilgejit ahte dán giđa leat vuot boraspiret stuora roassun áldoealuid siste. Sii čilgejit ahte mediain oidno ahte dát roassu lea buot fylkkain Norggas gos lea boazodoallu, muhto earenoamážit davimus fylkkain. Mannan dálvi lea maiddái guohtuma dáfus leamašan dakkár roassodálvi boazodollui man eai leat 50 jahkái vásihan, eai ge vuordde dili buorránit ovdal geasi. Dasa lassin boahtá vel dál roassu boraspiriiguin. Sii čállet ahte dál vurdet ahte biddjo seamma stuora deaddu bohccuid dillái ja čálgui, go dassážii lea biddjon boraspiremáddodaga seailluheapmái.
Norgga bidjá boraspiresoahpamušrámmaid boraspiriid hálddašeapmái. Soahpamušas leat biddjon nationála mihttomearit mat meroštallet man stuoris boraspiremáddodat galgá Norggas. Norggas ii leat lohpi bivdit boraspiriid. Soahpmamušas lea maid mearriduvvon ahte guottetbáikkiin eai galgga boraspiret mat sáhttet vahágahttet bohccuid.
Boraspireroasu oaidná juohkehaš gii lea sosiála mediain maid. Beaivválaččat oidnojit govat čukkohallan dahje goddon misiin, muhtumiin maid goddojuvvon rávis bohccot. Boazodoallit muitalit ahte goaskin lea nu issorasat laskan, ja muhtin orohagain giksašuvvet getkkiin ja guovžžain maid. Mannan vahkku čáliimet ge boazodoalli birra gii jearrá man olu galget boazodoallit gierdat ja man olu galget sii máksit stáhta návddiid ovddas.
Dál lea áigi rievdadit boraspiriid ja goaskimiid hálddašeami go oaidnit jagis jahkái man stuora vahágin boraspiret leat. Boazodoallit geahččalit duođaštit váttisvuođa, muhto dattetge eai leat eiseválddit addán sidjiide doarvái buriid vejolašvuođaid gáhttet iežaset elliid.
Dan duostat čuoččuhit ahte boazosámit fertejit oažžut buoret vejolašvuođaid gáhttet misiid. Danne ii leat váttis doarjut gáibádusa Stuoradiggái ahte dál ferte vajot addot vejolašvuohta báhčit boraspiriid guottetbáikkiin. Norga lea riikkaidgaskasaš soahpamušaid mielde geatnegahttojuvvon sihkkarastit boazodoalu boahtteáiggi, ja juste boraspireváttisvuohta sáhttá ge leat roassu mii áitá boazodoalu boahtteáiggi. Vássán dálvi ja giđđa lea leamašan garas boazodollui. Olu báikkiin leat bohccot heajos vuoimmis ja dan geažil eai dáidde ealut nu miessát. Seammás oaidnit ahte olu misiin mat riegádait gártet goaskimiid gaccaid gaskii dahje eará boraspiriid bániid gaskii.
Seammás lea maid dehálaš muitit ahte boraspireváttisvuohta ii leat dušše ekonomalaš roassun ealáhussii. Dat sáhttá maid garrasit čuohcat boazodolliide psyhkalaččat oaidnit boraspiriid hearjideame, eai ge beasa dahkat dainna maidege.
… boraspireváttisvuohta ii leat dušše ekonomalaš roassun ealáhussii.