DÁL SÁVVET gielddas vel doarjaga
Oapmahaččat háliidedje buoret árgabeaivvi sin lagamuččaide, ja čogge ruđa. Dál livččii gieldda duohken dorjot go sii vel lassi ruđain.
Elisabeth Joks lea áŋggirdeaddji oapmahaš gii bijai johtui ruhtačoaggima, ja muitala stuora beroštumi servodagas.
– Dasa lei hui stuora beroštupmi olbmuin. Averdi, Kapro AS ja Davvi Girji válde maid hui jođánit oktavuođa ja skeŋkejedje TV. Mii leimmet sávvan golbma, muhto oaččuimet njeallje, illuda Joks.
Sii áigo maid ođđa stuoluid ja beavddi fuolahusvisttiide, mat leat heivehuvvon ássiid ja bargiid dárbbuide. Go leat vuollelaš 24 000 ruvnno čoaggán, de váilu ain 64 113 ruvnno ovdal sáhttet daid oastit. Oapmahaččat sáddejedje ohcama gildii gos bivde gieldda gokčat reasta goluid.
– Mun oidnen ahte gielddadirektevra lei hui positiiva, ja rámidii go oapmahaččat leat álggahan dan. Dat goit orru hui buorre, dadjá Joks.
Positiivat
Duorastaga meannuda Kárášjoga gieldda ovdagoddi ášši, ja Joks sávvá ahte ožžot buori vástádusa.
– Dat mielddisbuvttášii buoret ergonomiija ássiide, vai sii besset álkit stullui ja eret stuolus. Muhtin stuoluin leat juvllat. Dat attášii maid buoret bargodilálašvuođa bargiide. Beavddit leat dakkárat maid sáhttá bajidit ja vuolidit dárbbu mielde. Mii leat maid viežžan fálaldaga báikkálaš fitnodagas. Buot maid leat oastán, lea maid oastán báikkálaš fitnodagain, go midjiide lea dehálaš doarjut báikkálaš fitnodagaid vai doalahit fálaldagaid gielddas, muitala Joks.
Gielddadirektevra árvvoštallamis cealká ahte lea guhká leamaš jurdda ođasmahttit fuolahusvisttis viessogálvvuid, muhto ii leat ruhtadilli leamaš dasa. Son rámiida álggaheami, ja ávžžuha ahte ovdagoddi doarju dan.
Stuora mearkkašupmi
Sii leat oapmehašjoavku geat ovttasbarget ja gulahallet ovddidit sin lagamuččaid áššiid.
– Mii sávvat ahte oažžot dán sadjái nu jođánit go vejolaš. Das livčče nu ollu árvu sidjiide geat orrot doppe. Smávva diŋggat sáhttet mearkkašit hui ollu. Ovdamearkan lea go ođđa ja stuorát TV bođii sadjái. Mu áhčči lea ealgabivdi leamaš, ja go oinnii ealgga das, de dadjalii ahte lei heitot go ii lean bissu mielde go ná ollu ealggat leat. Eará ossodagas ledje maid geahččan giđđajohtima ja ságastallan dan birra. Dat čájeha ahte sáhttá álggahit ságastallama ja ráhkadit fiinna bottu ovttas, dadjá Joks.