Máŋga čázádaga sáhttet dulvat
Romssa ja Finnmárkku fylkkas lea fylkkamánni čohkken gielddaid ja NVE ovttasbargat vejolaš giđđadulvvi ektui. Kárášjoga gielda lea bures ráhkkanan vejolaš dulvái.
NVE einnostusaid mielde lea stuorra várra ahte máŋgga čázádaga fylkkas sáhttet dulvat. Dat sáhttá dagahit váttisvuođaid eanandollui, billistit ja giddet luottaid, nuoskkidit juhkančázi, lasihit eanandoarggástusvára jna.
– Lea dehálaš ahte leat buorit ráhkkaneamit mat unnidit vahágiid dulve- ja eanandoarggástusvárrii. Mii fertet maid fuomášuhttit stuorra čázádagaid oalgejogaid. Dain sáhttet jogat golgagoahtit eará guovlluide ja dahkat stuorra vahágiid, dadjá fylkka gearggusvuođahoavda Ronny Schjelderup.
Duđavaš gielddaid ráhkkanemiin
Romssa ja Finnmárku fylkkamánni lea duđavaš gielddaid ráhkkanemiin vejolaš giđđadulvái. Fylkka gearggusvuođahoavda Ronny Schjelderup muitala preassadieđáhusas ahte sis lea leamaš čoahkkin buot gielddaiguin ja ovttasbargoguimmiiguin fylkka gearggusvuođaráđis. Sin mielas leat gielddat buori barggu dahkan ráhkkanit vejolaš giđđadulvái.
Guđa beaivvis lea dulvan 100 kubihkkamehtera
NVE statistihka mielde čájehuvvo ahte Veahkkava, Iešjoga stašuvnnas lea guđa beaivvis dulvan sullii 100 kubihkkamehtera.
Ráhkkanan dustet jus šaddá dulvi
Vahkku áigi čálii Ávvir ášši Kárášjoga gieldda birra ahte leat ráhkadan gearggusvuođaplána ja vejolaš eváhkkoplána. Duorastaga, miessemánu 28. beaivvi sullii diibmu 15, doarggistii eana Kárášjogas. Dalle lei NVE bávkaladdamin.
Ávvir lea gulaskuddan Kárášjoga gieldda sátnejođiheddjiin ja son dadjá ahte sis lea buorre ovttasbargu leamaš NVE:IN.
– NVE:IN mis lea buorre ovttasbargu. Leat olu čoahkkinastán juste bovrema ja dulvvi birra. Lean eahpesihkar lei go gielda ožžon dieđuid juste goas NVE galggai álgit bávkalemiin, muhto mii diđiimet ahte NVE áiggui dán áigodagas, muitala Kárášjoga sátnejođiheaddji Svein Atle Somby.
– Eai bala Kárášjoga bealis ahte šaddá stuorra dulvi
Sátnejođiheaddji muitala ahte NVE ii bala ahte Kárášjogas šaddá stuorra dulvi:
– Mii leat čoahkkinastán ollu NVE:IN. Dálvet balle ahte sáhtii šaddat stuorra dulvi dan ollu muohttaga geažil, muhto dál lea ceahkki njiedjan, nu ahte eai bala Kárášjoga bealis. Čáhci sáhttá loktanit, muhto gieldda bealis mii leat ráhkkanan ja bidjan plána jus šaddá vejolaš dulvi, muitala Somby.