– Eat leat duhtavaččat
ráđđehusa bieggamillohuksen-njuolggadusaiguin Bearjadaga bođii diehtu ahte ráđđehus evttohii čavget bieggamillohuksema njuolggadusaid. Sámediggeráđđi Silje Karine Muotka dadjá ahte lea hirpmástuhtti eaige sii leat duhtavaččat árvalusain.
Stuorradiggedieđáhusas bođii ovdan ahte boahtteáiggis áigot deattuhit maid ránnját oaivvildit bieggafápmoáššiin. Earret eará áigot eiseválddit rievdadit unnimusgáibádusa man lahka báikkiid bieggamillut ožžot huksejuvvot. Stuorradiggedieđáhus ovdanbuktojuvvui preassakonferánssas oljo- ja energiijaministara Tina Bru ja dálkkádat- ja birasministara Sveinung Rotevatn bokte.
Dainna ii leat sámediggeráđđi
Silje Karine Muotka duhtavaš.
– Mii leat dadjan dan lea hirpmástuhtti go ráđđehus ovddida dakkár árvalusa mas ain vuoruhit bieggaindustriijaaktevrraid. Go hábmejit dakkár konsešuvdnavuogádaga mas lea vejolaš ásahit diekkár sisabahkkenprošeavttaid sámi boazodoalloguovlluide earret eará, muitala sámediggeráđđi Silje Karine Muotka..
Son dadjá ahte 40 proseantta Norgga areálas lea boazodoallu, ja jos ráđđehus háliida bidjat johtui dakkár doaimmaid, de lea dehálaš ahte vuoruhit guovlluid gos orrot olu olbmot nu ahte eai šatta olu liigesisabahkkenprošeavttat.
– Ja ahte dat geavahuvvo doppe gos lea dat dárbu, sihke olmmošlaš dárbu ja vejolašvuohta cegget dakkár rusttegiid jos duođaid oaivvildit ahte lea dárbu, dadjá Muotka.
Eai leat duhtavaččat
– Min mielas lea hirpmástuhtti go dat lea olmmošvuoigatvuođaid ja eamiálbmogiid birra, suddjet já váldit vára eamiálbmotberoštumiin. Lea dehálaš vuođđosivva das go mun oaivvildan ahte dat bargu ii doala deaivása iige dat leat buorre árvalus ja vuorddán ahte sáddejuvvo ruovttoluotta ráđđehussii, dadjá Muotka.
Muotka ii loga sin duhtavažžan vaikko árvalusas leat muhtin diŋggat mat leat buorit, son čujuha earret eará dasa ahte árvalit bidjat johtui mekanismma mas lea vejolaš árrat hilgut prošeavttaid maid ii leat vejolaš čađahit.
– Dat mielddisbuktá ahte ii dárbbaš geavahit nu olu olmmošlaš návccaid ja jagi meannudit dakkár áššiid mat aŋkke leat eahperealisttalaččat. Dat lea dieđusge buorre, muhto dat gáibida maiddái láhkarievdadanproseassa, nu ahte dat ii leat dakkár rievdadeapmi mii boahtá johtui ovttatmano, dadjá Muotka.
Muotka dadjá ahte eai galgga leat bieggamilloprošeavttat sámi boazodoalloguovlluin gos eai leat dohkkehan dan.
– Dasa lassin daddjo máŋgga sajiin ahte galget vuoruhit boazodoalu beroštumiid, ja dat lea dieđusge sin váldooaidnu, dadjá son.
– Olu maid olmmoš livččii sáhttán dadjat
– Buot buoremus mii lea dehálaš lea ahte subsidieren nohká. Stáhta ii galgga šat bálkáhit olgoriikka berošteddjiid min guohtuneatnamiidda. Váttisvuohta lea ahte 100 lobi leat addojuvvon ja leat dušše 40 prošeavtta mat leat álggahuvvon, nu ahte mis leat ain 60 stuorra industriijasisabahkkenášši mat sáhttet boahtit johtui goas nu dás ovddos guvlui, muitala Muotka.
Son dadjá ahte doppe lea olu maid olmmoš livččii sáhttán dadjat, muhto son doalaha váldoperspektiivva das ahte sii eai hálit prošeavttaid guohtuneatnamiidda. Son dadjá ahte ferte daid bidjat johtui doppe gos orrot eanemus olbmot, dat geat dárbbašit liigeenergiija.
– Mis lea doarvái čáhceelrávdnji dáppe Norggas nu ahte lea eambbo das ahte olgoriikaeksporta mii lea váldohástalus dán ášši ektui. Mu mielas livččii galgan dalle vuoruhit olmmošlašvuoigatvuođaid ja eamiálbmogiis ovdalii beroštumi eksporteret elrávnnji Eurohpái, loahpaha Muotka.
Dás sáhtát lohkat ráđđehusa evttohusaid.