Gilvalii vuosttaš geardde ruovttušiljus
Go Kárášjoga mohtorsearvi vuosttaš geardde lágidii Karax MX gilvvuid, de beasai ge maid Thor David Rasmus vuosttaš geardde gilvalit ruovttubáikkis. Ieš ii lean nu duhtavaš vaikko faskii ge silbba.
Kárášjoga gánda Thor David Rasmus gilvala MX85 13–15-jahkásaččaid luohkás ja son lea ge vuodján bures jo máŋga jagi. Muhto nu go buot eará gilvvohallamiin ja doaluin, de lea koronavirusa leavvan bissehan ollu motocrossas ge.
Thor David Rasmus muitala Ávvirii ahte son ii leat dán jagi hárjehallan nu ollu go livččii háliidan ja galgan, go son lea bargan ollu ja Deanučázádaga dulvi lea maid billistan su hárjehallanšilju. Dattetge son vujii bures eaige lean go guokte smávit lihkohisvuođa mat billistedje su ovdii.
Vuosttažin guovtte geardde
Vuosttaš vuodjinvuorus lei Rasmus guođđán buot gilvaleddjiid ja lei duohpagoahtán maŋemusaid olles jorbadasain go ovdajuvla massii coavccu ja Rasmusa vuoján gopmánii. Son jovssahalai, muhto nagodii vuodjit fas measta buohkaid meaddel ja bođii nubbin.
Nuppi vuodjinvuorus dáhpáhuvai measta seamma. Rasmus lei ovddemusas go seamma mohkis šiljus, go vuosttaš vuorus, fas čálistii ovdajuvla ja vuoján gopmánii. Dán háve ii ollen Rasmus joksat buohkaid, ja son ollii goalmmádin mollii.
Finálas nubbin
Ovdal finála vuodjima lei Rasmus goalmmádin, olles gávcci čuoggá Gustav Pettersen maŋis ja dássálaga Ulf Isak Aleksanderseniin. Dat mearkkašii ahte jus Rasmus dahje Aleksandersen galggai sáhttit joksat Pettersena, de fertii Pettersen boahtit buot maŋemussii ja Rasmus dahje Aleksandersen vuoitit. Jus Pettersen ii boađe maŋemussii, de šattai nu ahte son goabbá buorebut vuodj Aleksandersenis ja Rasmusis, son boahtá nubbin gilvvus.
Nu go dan guovtti vuosttaš vuodjimis ge, de leigga Pettersen ja Rasmus buorebut go dat earát ja doaruiga guhká njunnošis ovdal go Rasmus dego vuollánii ja divttii Pettersena guođđit su. Rasmus bođii nubbin ja Pettersen vuittii.
– Mun in leat áibbas duhtavaš nuppiin sajiin, dajai Rasmus várrogasat Ávvirii maŋŋel vuodjima.
– Buorebut go vurden
Guokte beaivvi ovdal go gilvvut ledje de čálii Ávvir ahte mohtorsearvi lea ráhkkanan bures gilvvuide. Áidna mii duorastaga váillui lei vuodjinšilju. Muhto mohtorsearvvi miellahtut ja veahkit ordnestedje vuodjinšilju, ja mohtorsearvvi jođiheaddji May Helen A. Rasmus lei bures duhtavaš lágiidemiin.
– Mu mielas lea mannan mihá buorebut go mun doivon. Mii leat hupman lágidit dákkár gilvvuid máŋga jagi, muhto ii leat leamaš nu álki beassat geavahit dán šilju. Dál viimmat beasaimet váldit dan atnui ja go jo ii šaddan beassášcrossa, de mii mearrideimmet ahte dál mii lágiidit dákkár gilvvu, dadjá Kárášjoga mohtorsearvvi jođiheaddji.
Son muitala ahte leat leamaš guhkes ijat, ollu njoammuneastadandoaimmat maid lea galgan jurddašit ja bargiid fertii gávdnat.
– Olbmot leat lihkus hui čeahpit, sii čuvvot njoammuneastadandoaimmaid eaige čoahkkán stuora joavkkuide. Mun lean hui duhtavaš lágidemiin, dadjá May Helen A. Rasmus.
Sátnejođiheaddji rámida
Okta birrasii 200 olbmos gii lei boahtán geahččat Karax MX gilvvuid lei Kárášjoga sátnejođiheaddji Svein Atle Somby. Su mielas lei hui miellagiddevaš geahččat dakkár gilvvuid, ja dajai vuodjimiid muittuhit skutercrossgilvvuid.
– Dat lea measta nu go skohtercrossa, ja lea nu ahte vel mii ge áddet dán gilvvus juoidá, mojohallá sátnejođiheaddji ja rámida Kárášjoga mohtorsearvvi ja dan barggu maid sii barget.
– Mii diehtit ahte dáppe stuorru mohtorgilvobiras ja mis leat nuorra vuoddjit. Lea hui somá geahččat sin go vudjet. Ja de lea dieđus hui somá geahččat go Thor David vuodjá. Mun lean boahtán su geahččat ja jáhkán dáppe leat oallugat boahtán geahččat su go lea hui somá go mis lea okta gii lea buoret go earát, dadjá sátnejođiheaddji.
Beahtahallan
Ieš Thor David Rasmus gal ii lean nu duhtavaš, muhto baicca eambbo beahtahallan. Dát gilvu lei ge nubbi gilvu masa searvvai dán jagi ja soittii leat nu ahte ledje vuordámušat dahkat buorebut go vuos ruovttušiljus lea gilvaleamen.
– Mun lean veaháš beahtahallan. In leat vuodján maide dán geasi ja mun lean váiban, ledje Thor David Rasmusa dovddut maŋŋel go ollii mollii finálavuodjimis. Son lohká iežas bargan dálus olles geasi ja go giđđadulvi vel billistii su hárjehallanšilju, de ii leat šaddan ii hárjehallat ge.
Boahtte vahkkoloahpa lea Thor David Rasmus gilvaleamen Čáhcesullos ja Várggáin gos vuosttaš Davvi-norgga meašttirvuorut leat.