Sámedikki doarjja lea veahkkin olahit vistehuksema
Sámediggeráđđi lea juolludan 500 000 ruvdnosaš doarjaga Porsanger Treindustri AS:I Leavnnjas ja 410 000 ruvdnosaš doarjaga Vuorji Rein AS:I Kárášjogas.
Porsanger Treindustri AS lea jagi 2010 rájes buvttadan viessogálvvuid ja muorragálvvuid diŋgoma vuođul. Eanaš oassi buktagiin mannet priváhta márkanii, ja sáddejuvvojit miehtá riikka. Fitnodat láigoha dál lanjaid Leavnnja boares meieriijavisttis. Sámedikki doarjja galgá geavahuvvot sierra buvttadanvistti huksemii. Porsanger Treindustri AS beaivválaš jođiheaddji Lars Damhaug lohká doarjaga leat stuorra veahkkin olahit prošeavtta maid sii leat plánen.
– Dát doarjja lea stuorra mearkkašupmi vai mii sáhttit olahit iežamet prošeavtta. Dál mii bargat dan várás ahte oažžut huksenálggu čavčča mielde ja visti doaivumis lea gárvvis giđđii, dadjá Damhaug.
Stuorra hutkkálašvuhtii ja fitnodatovdáneapmái
Ođđa lanjat galget heivehuvvot erenoamážit Porsanger Treindustri buvttadeapmái, mii buoridivččii fitnodaga árvoháhkama ja gánnáhahttivuođa.
– Dán lágan investeren váikkuha stuorra hutkkálašvuhtii ja fitnodatovdáneapmái. Danne vuoruhuvvojit dakkár prošeavttat min doarjjaortnegiin, dadjá sámediggeráđđi Silje Karine Muotka sin preassadieđáhusas.
Ovdánahttit báikkálaš fintodagaid
Lanjat leat hábmejuvvon iežaset vásáhusaid vuođul, ja dálá hábmen-, áibmomolsun- ja Dbs-gáibádusaid vuođul. Fitnodat háliida geavahit koronadili dasa ahte investeret fitnodatovdánahttimii ja ođđa márkaniidda vai sii leat gergosat lágidit gálvvuid go pandemiija lea nohkan.
– Porsanger Treindustri lea gelddolaš fitnodat man márkanin lea olles riika. Porsáŋgu gullá SED-GUvlui ja Sámediggi háliida áinnas váikkuhit dasa ahte eanet báikkálaš fitnodagat regiovnnas ovdánit. Nu mii sáhttit váikkuhit eanet báikkálaš árvoháhkamii ja eanet bargosajiide, dadjá sámediggeráđđi.
Buoridit báikkálaš árvoháhkama boazodoalus
Vuorji Rein AS lea Kárášjoga biebmogálvofitnodat mii galgá viidáseappot ráhkadit bohccobierggu mii boahtá sin iežaset boazoguohtunguovllus. Sii leat ovdal ožžon álggahandoarjaga Sámedikkis, ja dál lea fitnodat ođđa muttus go sii áigot earret eará gárvvistit buvttadanlanjaid ja ovddidit buktagiid. Prošeavtta ulbmil lea buoridit báikkálaš árvoháhkama boazodoalus, mii lea okta Sámedikki vuoruhuvvon surggiin.
– Dát prošeakta lea ovddidandoaibmabidju dakkár investeremiiguin mii addá báikkálaš viidásat ráhkadeami ja sámi guovlluid borramuša stuorát gávpejoru. Dat addá eanet báikkálaš árvoháhkama, lassin dasa ahte márkanii bohtet eanet buktagat válljenláhkai. Dan mii háliidit doarjut, dadjá sámediggeráđđi.